• Realizauen era rota Carros de Foc e se les vedec per darrèr còp eth diuendres, 25 de seteme, ena zòna Refugi Colomèrs

• Efectius deth GRM de Pompièrs-Emergéncies, eth GRAE de Bombers de la Generalitat, eth GREIM dera Guardia Civil e era UIM de Mossos d’Esquadra encetèren ager ua recerca aeriana e terrèstra ena zòna entà localizar-les

Efectius deth Grop de Rescat en Montanha (GRM) de Pompièrs-Emergéncies, amassa damb d’auti còssi de seguretat, inicièren ager era recerca de dues persones despareishudes eth passat diuendres, 25 de seteme, que se trapauen realizant era rota Carros de Foc e sigueren visti per darrèr viatge ena zòna de Refugi de Colomèrs.

Dempús de recéber er avís dera sua desparicion, era recerca comencèc ager, 28 de seteme, per via aeriana e terrèstra damb dus elicoptèrs dera Generalitat e er elicoptèr Eliance Val d’Aran. En aguest operatiu i participèren 6 efectius deth GRM de Pompièrs-Emergéncies, 4 efectius deth Grop de Supòrt d’Actuacions Especiaus (GRAE) de Bombers de la Generalitat arribadi d’Olot e La Seu d’Urgell, e 2 efectius dera Unitat d’Intervencion en Montanha (UIM) de Mossos d’Esquadra.

Aguesta recerca contunhe pendent eth dia d’aué damb un increment de recorsi entà localizar as despareishuts, e en elipòrt de Vielha s’a installat eth Centre de Contròl entà coordinar-les. Er operatiu ei conformat per elicoptèr Eliance Val d’Aran e 10 efectius deth GRM, dus elicoptèrs e 12 efectius de GRAE d’Olot, La Seu d’Urgell e Pobla de Segur, un guida canin des Bombers de la Generalitat e 6 efectius dera UIM de Mossos d’Esquadra,. Atau madeish s’incorpòren as trabalhs de recerca 4 efectius deth Grop de Rescat e Intervencion en Montanha (GREIM) dera Guardia Civil.

Era zòna a inspeccionar cònste de 1.500 ectares e s’a dividit en 5 sectors entà facilitar es trabalhs des còssi de seguretat.