• Es Agents de Miei Ambient deth Conselh Generau d’Aran an examinat aué un possible rastre e an remassat mòstres biologiques que seràn examinades pera UAB en marc deth programa LoupO, de confirmar-se, aguest serie eth prumèr exemplar dera espècia detectat en Aran

Tecnics e Agents de Miei Ambient deth Conselh Generau d’Aran an remassat mòstres biologiques e examinat pendent aguest maitin eth possible rastre d’un lop ena boca sud deth Tunèl de Vielha.

Aué, entàs 7:45 ores, en plena nheuada, eth conductor d’ua maquina de trèir-nhèu que trabalhaue ena zòna a observat un animau de gran envergadura en tot creuar er arriu Noguera Ribagorçana. En apropar-s’i, a podut comprovar qu’auie aspècte de lop e prenut ua fotografia abans qu’er animau marchèsse en direccion tath bòsc.

Dempús des prumèri trabalhs de seguiment deth rastre e remassada de mòstres amiadi a tèrme pes Agents de Miei Ambient, tot semblarie apuntar que, efectivament, poirie tractar-se d’un lop. Probablement, bèth un des exemplars localizadi darrèrament en Aragon.

Es mòstres entara analisi genetica an estat enviades ara UAB, e seràn analizades en marc deth programa LoupO. De confirmar-se er ADN des mòstres biologiques obtengudes, aguest serie eth prumèr exemplar dera espècia detectat ena Val d’Aran.