Era sedença deth Conselh Generau d’Aran a estat er scenari dera presentacion dera 1a edicion dera pròva ciclista de BTT, Naut Aran 2000, que formarà part der Open d’Espanha de BTT Maraton XC, e qu’ath viatge tanben supausarà eth Campionat de Catalonha de BTT.

Aguesta competicion recorrerà bona part deth territòri dera Val d’Aran, en tot passar pes municipis de Naut Aran, Vilamòs e Vielha e Mijaran. Ua pròva damb 111,3 kms e 3420 mètres de desnivèu positiu, ena que i aurà desparières categories: Elèit, Sub 23 e Mastèr 30, completaràn es 111,3 Km de carrèra e es categories de Fèmines Elèit e es categories Mastèr 40, 50 e 60 haràn 66,53 Kms.

Era gessuda aurà lòc en Arties e era arribada en Salardú e tanben se disputarà un Sprint Especiau en Km. 100 en Vielha. Se pujaràn pòrts plan exigents coma Pruedo (2145 m.), Òrri (1878 m.) e Varradòs (2020 m.).

Tanben aurà lòc ua marcha ciclotorista ena que s’establirà un sistèma de dehòra de contròtle enes desparièrs sectors enes qu’ei dividida era pròva entà assegurar eth bon desvolopament d’aguesta e era seguretat des participaires.

“Era Naut Aran 2000 ei ua mòstra més dera qualitat toristica e esportiva qu’a era Val d’Aran, non sonque ena sason d’iuèrn, senon tanben en ostieu, a on auem granes pròves esportives que mos autrègen un lòc privilegiat en Estat Espanhòu”, comente eth vicesindic prumèr, Luis Carlos Medina.

“Er Open d’Espanha de BTT mos place en panorama esportiu de referéncia entà qu’era gent pogue conéisher es particularitats dera Val d’Aran pendent tot er an a nivèu esportiu coma en d’auti airaus”, manifèste eth conselhèr d’Espòrts e Joenessa, Marcos Viló.

En madeish acte, tanben se presentèc era 2au edicion dera Ultra Trail Val d’Aran, qu’aurà lòc pendent eth 9 d’agost. Aguesta pròva tanben recorrerà bona part dera geografia dera Val d’Aran. Er acte siguec presentat peth membre dera organizacion, Arcadi Climent.