Eth Conselh Generau d’Aran, Torisme Val d’Aran e er Ajuntament de Naut Aran contunhen fomentant er espòrt d’elèit.

Er aranés, Ruben Caseny, competirà ena equipa internacionau.

Aué s’a presentat ena sedença de MASSI en Granollers era naua equipa MASSI- KUWAIT CYCLING PROJECT, equipa continentau UCI (Union Ciclista Internacionau), a on competís er aranés, Ruben Caseny. Er acte a compdat damb era preséncia deth vicesindic d’Aran e conselhèr d’Espòrts, Luis Carlos Medina e dera conselhèra de Torisme e Desvolopament Economic d’Aran, Anna Díaz.

Es institucions araneses (Conselh Generau d’Aran, Torisme Val d’Aran e Ajuntament de Naut Aran) ath costat dera mèrca catalana de biciclètes MASSI, an estat ua pèça clau ena creacion d’aguesta equipa, per auer aconselhat e apiejat ara “Federacion de ciclisme de Kuwait” ena creacion d’aguest nau projècte.

Era equipa aurà era sua sedença en Kowait, país que vò invertir e apostar peth ciclisme damb un projècte a long termini, mès compdarà damb un dusau blòc en Aran que garantirà era incorporacion ath ciclisme professionau de corredors aranesi e catalans. Aguesta equipa ja hec concurréncia en aguesta categoria est an passat, mès enguan se renauís e s’a refortilhat damb naui patrocinadors e corredors europèus qu’aportaràn era sua experiéncia e coneishences.

Eth blòc europèu serà integrat, ath delà der aranés Ruben Caseny, peth lheidatan Marc Vilanova, er alacantí Axel Costa e er alemand Andreas Keuser, e d’auti europèus que competiràn principauments enes carrères dera peninsula e Euròpa Occidentau. Eth blòc damb sedença en Kowait afrontarà es competicions deth Golf Persic, Asia e Euròpa der Èst.

Ruben Caseny, signèc un convèni damb eth Conselh Generau d’Aran entà promòir era destinacion toristica esportiua Val d’Aran peth mon, representada ena imatge e enes valors deth ciclista. “Qui melhor qu’es nòsti joeni esportistes professionaus aranesi entà representar eth nòste país e eth sentiment d’identitat” manifestèc Carlos Barrera, sindic d’Aran.

Vielha, 12 d’abriu de 2016

Conselh Generau d’Aran: Núria Sanjuan

Hònt: MASSI- KUWAIT CYCLING PROJECT