Vielha, 14 de junh de 2018.- Eth vicesindic d’Aran e conselhèr d’Espòrts Luís Carlos Medina, acompanhat des organizadors, a presidit er acte de presentacion des 30 ores de Fotbòl Sala-Vila de Vielha, que se disputen es pròplèus dies 16 e 17 de junh, e qu’enguan arriben ara 11au edicion.

Pendent era presentacion, qu’auec lòc ena sedença deth Conselh Generau d’Aran, Luís Carlos Medina volec arregraïr as organizadors er esfòrç e era implicacion en aguest eveniment esportiu que, segontes es sues paraules, reafirme eth hèt qu’era Val d‘Aran non ei sonque un lòc de montanha e esquí, pr’amor qu’i a ua grana aficion ath fotbòl e concrètaments ath fotbòl sala.

Pera sua part, es integrants dera Associacion Esportiua Fotbòl d’Aran, organizadora des 30 ores de fotbòl, dempús d’arregraïr era collaboracion deth Govèrn d’Aran, expliquèren qu’enguan eth torneg començarà eth dissabte peth maitin e compdarà damb 14 equipes, cinc d’eri de dehòra dera Val d’Aran, en lòc des 20 qu’i auie anterioraments e que se disputarà coma en edicions anteriores damb ua “liguilla” clasificatoria e ua posteriora fasa eliminatòria, tot açò pendent trenta ores ininterrumpides en Palai d’Espòrts de Vielha.

Eth prèmi entara equipa guanhadora deth torneg ei un trofèu e 2.000 èuros en efectiu, entath dusau classificat, ath delà deth trofèu guanharà 750 èuros. Ath delà, coma cada an, aurà prèmis entath màxim golejador, portèr e eth jogador mès valuós.