Dissabte dia 15 ena Aula 1 der Edifici Polivalent deth Campus de Cap Pont dera UdL auec lòc era presentacion des ”GÒIS A SANT RÒC DE VILAMÒS” ua composicion musicau religiosa en aranés damb letra deth poèta dera Val d’Aran Jèp de Montoya e musica deth compositor d’ascendència aranesa Jaume Masana “CASTÈTH”.

Eth cant des Gòis, ua anciana tradicion qu’encara se conserve en quauques localitats deth País, auie desapareishut entièraments en Vilamòs (Val d’Aran), per çò qu’eth Grop de Musica e Cultura Aranesa, “Es Paums” a instància der Ajuntament de Vilamòs a recuperat damb es dus autors aguesta tradicion.

Eth resultat ei ua bèla composicion poetic-musicau d’ueit estròfes mès introduccion e tornada en vèrsi eptasillabs entièraments en aranés.

Es Gòis s’an editat en ua bèla lamina artistica en edicion limitada e numerada qu’ager se liurèc as assistents ara presentacion e que conten era letra, era musica e ua òrla damb motius dera flòra, fauna e istòria dera Val d’Aran.

Es Gòis a Sant Ròc de Vilamòs ei era quatau creacion musicau qu’an produsit amassa es dus autors e hè part d’un projècte iniciat per ambdús en an 2014 que preten méter musica as tèxtes d’autors aranesi de toti es tempsi. Peth moment s’an editat ath delà des Gòis, era balada Net de Huec, eth ròck Hilh e eth nadalet Era Soca de Nadau, toti en aranés e que son includidi en CD editat peth Grop “Es Paums” en 2015, damb eth patrocini deth Conselh Generau d’ Aran e eth Institut d’Estudis Ilerdencs dera Diputacion de Lhèida.

Es Paums, Lleida 16 de Juriòl de 2017