Es membres deth conselh permanent der Institut d’Estudis Aranesi- Acadèmia aranesa dera lengua occitana, dirigidi peth sòn president Jusèp Loís Sans, an presentat ath sindic d’Aran Carlos Barrera, es tres prumères publicacions dempús de que hè dus ans se publiquèsse eth decrèt de creacion dera Academia.
Se tracte de tres òbres, “Gramatica basica der occitan aranés”. “Per escriure l’occitan”. “Discorsi de presentacion der Institut d’Estudis Aranesi – Acadèmia aranesa dera lengua occitana (Arties 10 de Junhsèga de 2015) Discorsi d’entrada ena Acadèmia (Vielha 9 de Junhsèga de 2015)”.
Pendent era presentacion des òbres, Jusèp Loís Sans, expliquèc qu’es membres der IEA – Acadèmia aranesa dera lengua occitana se senten “eretièrs dirèctes d’ua lengua millenària, era lengua mès prestigiosa dera istòria dera literatura, qu’ei era mès fidèla e pròplèu ara emplegada pes trobadors”.
En cas dera “Gramatica basica der occitan aranés”, qu’eth conselh permanent se ne senten fòrça capinauti, Sans a destacat er hèt que se tracte d’un tèxte provisionau, donques qu’era lengua a dit “ei deth pòble e non serà enquia laguens d’un o dus ans quan se harà era publicacion definitiva, donques qu’açò depenerà der emplec sociau que se hèsque dera madeisha”. D’aguesta òbra s’an editat 2.500 exemplars.
En çò que tanh a “Per escriure l’occitan” de Jacme Taupiac, Sans a explicat qu’ei eth lingüista mès arreconeishut dera lengua occitana actuauments e qu’ei era madeisha nòrma qu’utilize eth ministèri d’educacion en França. Un tèxte ahigec que se poderà utilizar ena ESO e bachillerat. S’a hèt ua edicion de 1.000 exemplars.
Era edicion de “Discorsi de presentacion der Institut d’Estudis Aranesi – Acadèmia aranesa dera lengua occitana e Discorsi d’entrada ena Acadèmia“, definís era filosofia de trabalh des membres dera Academia, atau coma des representants des institucions qu’an ajudat ara creacion e existéncia dera madeisha. S’an editat mil exemplars.
Pera sua part eth sindic d’Aran Carlos Barrera, manifestèc que “entà eth Conselh Generau d’Aran ei un plaser arrecéber aguestes prumères òbres editades, donques que son elements de coesion dera nòsta lengua entà mantier normalizat er aranés-occitan estandard e eth sòn emplec sociau”.
Des òbres se harà era presentacion e era distribucion en totes es escòles dera Val d’Aran e en Institut d’Aran entà metér-les a disposicion de directors, mèstres e alumnes. Tanben se presentaràn en toti es ajuntaments dera Val d’Aran. Mès endeuant serà eth torn de presentar-les ar IEC (Institut d’Estudis Catalans), as conselheries de Cultura e de Justícia dera Generalitat de Catalonha, en IEI (Institut d’Estudis Ilerdenses) e ena Deputacion de Lhèida.
Jusèp Loís Sans a volut arregraïr fòrça especiuaments es ajudes arrecebudes pendent aguesti dus ans peth Conselh Generau d’Aran, era Generalitat de Catalonha e era Fondacion Era Caixa.
Fin finala Sans, a auançat quauqui uns des trabalhs actuaus deth IEA- Acadèmia aranesa dera lengua occitana, coma son eth Vocabulari basic der aranés, era Sintaxi dera varietat aranesa- seccion estandard e era Gramaticia basica der occitan estandard.
