Eth Conselh Generau d’Aran e Foment Torisme Val d’Aran (FTVA), organizèren, dimèrcles 19 d’abriu era prumèra edicion dera Net deth Torisme dera Val d’Aran, celebrada en Otèl Montarto de Baqueira.
Aguest eveniment comencèc damb era presentacion per part d’Anna Díaz, conselhèra de Torisme e Desvolopament Economic d’Aran, dera memòria d’activitat de Torisme Val d’Aran der an 2016 e des principaus accions desvolopades e es principaus rèptes e accions mercades entà 2017.
Ofèrta Toristica dera Val d’Aran
Actuauments, era ofèrta toristica dera Val d’Aran a ua capacitat de 14.468 en ofèrta otelèra, 2.364 de lotjaments toristics reguladi, e 22.000 de dusau residéncia.
Era Val d’Aran compde damb un totau de 1.467 establiments, repartidi entre establiments otelèrs, lotjaments toristics, bars e restaurants, equipaments culturaus, enterpreses de torisme actiu e comèrci. Cap destacar era aumentacion de lotjaments motivadi peth registre de lotjament d’emplec toristic.
Demanda dera Val d’Aran
Anna Diaz, hec ua analisi sus era situacion e era evolucion dera demanda des visitants dera Val d’Aran e era comparason damb ans anteriors. Pendent 2016 era Val d’Aran a arrecebut 221.028 viatgèrs lotjadi en establiments otelèrs qu’an generat 674.985 pernoctacions. D’aguesta manèra eth volum de viatgèrs se manten respècte a 2015, damb un increment de 1,3%.
En çò que tanh ara procedéncia des viatgèrs que visiten era Val d’Aran, Díaz, destaquèc er increment de viatgèrs estrangèrs enes municipis de Naut Aran e Vielha e Mijaran, ua aumentacion de 3.820 respècte a 2015, 8,3%.
Parallèlaments, eth sojorn miei e es pernoctacions de visitants estrangèrs a comptabilizat un increment de 15,4% e 6,5% respectivaments.
Actuauments, eth torisme estrangèr, represente eth 24% dera demanda dera Val d’Aran.
Aucupacion mieja annau
Pendent 2016, era Val d’Aran, a enregistrat ua aucupacion mieja superiora ara des darrèri cinc ans.
Vielha e Mijaran, ei eth municipi qu’a mantengut ua estabilitat superiora ath rèste de municipis. Aguesta zòna ei era quau albergue mès places otelères dubèrtes pendent tot er an.
Accions desvolopades en 2016
Era accion mès importanta de Foment Torisme Val d’Aran pendent 2016, siguèc era organizacion dera gessuda dera 9au etapa deth Tour de França, era tresau pròva esportiua mès importanta deth mon e es accions prealables que se realizèren ena Val d’Aran, coma er aumenatge as 7 ciclistes espanhòus guanhadors deth Tour e era inauguracion en guardader deth Portilhon d’un monolit en reconeishement as hites esportiues d’aguesti sèt ciclistes. Sense desbrembar, era pedalada populara “La Fête du Tour”, un eveniment sociau en que i participèren mès de 200 ciclistes dera Val d’Aran.
Pendent era etapa deth Tour, e es accions prealables, era Val d’Aran artenhec ua aucupacion otelèra de 95%. Un impacte economic de 1,2 milions d’èuros, desglosadi en 305.420,43€ en lotjament e 918.554,42€ en restaurants e comestibles.
Era audiéncia televisiva entre es dies 9 ath 11 de junhsèga de 2016, siguèc de 21.651.000 espectadors, damb ua valor economica estimada de 3.7 milions d’èuros. En apartat online, era repercussion publicitària pendent eth periòde deth 1 ath 12 de junhsèga de 2017 siguèc de 6.617.370€ repartidi entre mejans online, cercaires, agéncies e blogs.
Reconeishements “Esséncia des Pirenèus”
Pendent era Net deth Torisme dera Val d’Aran, se liurèren es prumères reconeishements “Esséncia des Pirenèus” enes modalitats d’innovacion, sostenibilitat, tecnologia, accessibilitat e experiéncia toristica, autrejadi pes membres deth Conselh Tecnic de Foment Torisme Val d’Aran.
Aguesti reconeishements sigueren entàs enterpreses Verd e Blu, Caviar Nacarii, Camins e Pedals de Foc, pera sua contribucion enes diuèrsi àmbits toristics.
Ath delà, se volec arreconéisher especiuaments a Baqueira Beret, per esfòrç realizat entara dubertura dera estacion d’esquí enes darrèri Nadaus, que permetec un bon començament dera sason d’iuèrn ena Val d’Aran e a José Calbetó, pera sua trajectòria ena promocion toristica dera Val d’Aran.
Era conselhèra de Torisme, Anna Díaz, volec arreconéisher er esfòrç e es aportacions de totes es enterpreses toristiques dera Val d’Aran, atau coma a tota era equipa de Foment Torisme Val d’Aran, tant era equipa tecnica coma de informadors toristics peth sòn trabalh e dedicacion.
