• Er objectiu ei transportar esquiaires entre Bagergue e Baqueira ena sason d’iuèrn e integrar eth transpòrt escolar entar alumnat dera escòla Ruda de Salardú procedent de Bagergue e Unha e connectar damb eth transpòrt escolar des estudiants der Institut d’Aran, en tot apostar atau peth transpòrt collectiu, public e sostenible en nòste territòri

• Aguest projècte ei frut dera collaboracion dera EMD de Bagergue, eth Conselh Generau d’Aran eth Ministèri entara Transcision Ecologica e eth Rèpte demografic e eth HUB d’innovacion Hèpic damb es empreses Electric Riders, Arantec e Baqueira Beret

Aguest maitin a auut lòc er acte de presentacion deth Plan Pilòt entara implementacion d’un microbus 100% electric entà Bagergue, aguest projècte ei frut dera collaboracion dera EMD de Bagergue, eth Conselh Generau d’Aran e eth Ministèri entara Transcision Ecologica e eth Rèpte demografic damb es empreses Electric Riders, Arantec e Baqueira Beret e respon ara volontat d’apostar per un transpòrt public sostenible e mens contaminant.

“Damb era metuda en foncionament d’aguest plan pilòt, volem aufrir a vesins e visitants ua naua opcion de transpòrt collectiu entre Bagergue e Baqueira e, atau madeish, er objectiu ei integrar tanben eth transpòrt escolar entar alumnat dera escòla Ruda de Salardú e connectar damb eth transpòrt escolar des estudiants der Institut d’Aran”, explicaue eth president dera EMD de Bagergue, Marc Tarrau.

“Deth govèrn deth Conselh Generau d’Aran ençà èm plan satisfets de poder collaborar, a trauès deth nòste HUB d’innovacion HèPic, damb aguesta iniciativa e de poder desvolopar projèctes que prebotgen era mobilitat sostenibla e que balhen solucions tanben as problematiques de mobilitat que presente  eth nòste territòri pendent era sason d’iuèrn” afirmaue era sindica d’Aran, Maria Vergés.

Es veïculs electrics compartidi pretenen redusir, per un costat, eth nombre de veïculs  privadi e, per un aute, er impacte dera peada ambientau en territòri. Aguest minibus, qu’ara estúdie es aspèctes tecnics dera rota coma era capacitat de maniòbra e era autonomia deth dispositiu, s’a d’entener coma un esturment laguens dera tendéncia d’apòsta pera transicion ecologica. Per aguest motiu, era energia entà produsir era electricitat deth minibus se sustente en hònts renovables coma era idroelectrica.