Vielha, 11 d’agost de 2017.- Eth pròplèu dimars dia 15 d’agost debanarà era presentacion e cant des Gòis a Sant Ròc de Vilamòs laguens des actes dera Hèsta Major dera poblacion.

Era presentacion ara qu’assistiràn eth sindic d’Aran, Carlos Barrera, eth baile de Vilamòs, Francisco Castet, serà tas 13:00 ores ena Missa de Hèsta major, cantada per “Es Paums” ena glèisa de Santa Maria de Vilamòs. Er acte compdarà ath delà damb era preséncia des autors Jusèp Antoni Castet (promotor), Jèp de Montoya (letra) e Jaume Masana “CASTELL” (musica). Tanben se repartirà un exemplar des Gòis entà cada assistent.

Ara seguida se harà era descubèrta d’ua placa commemorativa en aunor der Illustre Sr. Joan Coromines Vignaux, ena façada dera Casa dera Plaça, lòc a on viuec es diferenti moments des sòns sojorns ena Val d’Aran. Coromines ei autor des tèsis doctoraus sus er aranés “Vocabulario Aranés” publicat pera Impremta dera Casa de Caritat de Barcelona er an 1931, agranida e publicada er an 1991 coma “Eth Parlar dera Val d’Aran” (Gramaticiana, Diccionari e Estudis lexicaus sus eth Gascon) per Curial Edicions.

Anterioraments, eth dissabte 12 d’agost tas 19:00 ores ena madeisha glèisa de Santa Maria de Vilamòs, se harà era presentacion e assag generau des Gòis a Sant Ròc de Vilamòs, daurida a toti es que i volgatz assistir.