Era Delegacion deth Govèrn dera Generalitat de Catalonha en Madrid presentèc agèr dijaus, 29 de seteme, en Centre Culturau Blanquerna er Institut d’Estudis Aranesi- Acadèmia Aranesa dera Lengua Occitana.
Era presentacion anèc a cargue deth delegat deth Govèrn dera Generalitat de Catalonha en Madrid, Ferran Mascarell, deth vicesindic d’Aran, Luis Carlos Medina, deth president der Institut d’Estudis Aranesi-Acadèmia aranesa dera lengua occitan, Jusèp Loís Sans, e deth president dera Seccion aranesa dera Acadèmia aranesa dera lengua occitana, Jèp de Montoya.
En acte se hec ua passejada pera realitat occitana e aranesa, se presentèc er emparament que Catalonha a dat ad aguesta minoria, s’expliquèc qué ei e coma foncione eth Conselh Generau d’Aran e se realizèc era presentacion dera Acadèmia aranesa dera lengua occitana e des sues produccions.
Eth delegat deth Govèrn dera Generalitat en Madrid, Ferran Mascarell, manifestèc era accion deth Govèrn dera Generalitat envèrs era lengua occitana; eth president dera Seccion aranesa dera Acadèmia aranesa dera lengua occitana, Jèp de Montoya, expliquèc as assistents era identitat aranesa, occitana, es aspèctes istorics mès destacats, e es auanci obtenguts enes darrèri trenta ans; eth president der Institut d’Estudis Aranesi- Acadèmia aranesa dera lengua occitana, Jusèp Loís Sans, parlèc sus era Acadèmia e es dues òbres fundamentaus “Gramatica basica” e normativa ortografica der estandard. Fin finau, barrèc er acte eth vicesindic d’Aran, Luís Carlos Medina, qu’expliquèc eth foncionament der autogovèrn aranés e dera proteccion dera identitat aranesa.
Era Val d’Aran ei un territòri de lengua occitana plaçat ena Comunitat Autonòma de Catalonha. Era reconeishença que Catalonha a dat a Aran a hèt que pendent es darrèri 30 ans se reinstaure era administracion pròpia der Aran, eth Conselh Generau d’Aran, qu’era lengua occitana, aranés en Aran, age obtengut èster oficiau en tota Catalonha e que se cree er Institut d’Estudis Aranesi damb reng d’Acadèmia.
Vielha, 30 de seteme de 2016
Conselh Generau d’Aran: Núria Sanjuan