Vielha, 23 de març de 2019.- Eth diuendres pera tarde se presentèc ena glèisa de Sant Estèue de Montcorbau eth bust en aunor a Mn. Jusèp Condò e Sambeat, òbra dera escultora Glòria Coronas, en tot coïncidir damb era commemoracion deth centenari dera sua mòrt.

Er acte, qu’amassèc a un nombrós public, compdèc damb era glosa que dera figura e dera òbra de Jusèp Condò e Sambeat hec Mn. Jusèp Amiell.

Neishut en Montcorbau eth 29 de març de 1867, Jusèp Condò e Sambeat siguec un sacerdòt, poèta e, segontes expliquèc Mn. Amiell, tanben musician, considerat eth prumèr escrivan en utilizar er aranés coma lengua literària.

Siguec ordenat sacerdòt en 1891, e destinat a desparières parròquies der Alt Urgelh e d’Aragon, enquia qu’en 1910 siguec destinat en Salardú. Mn. Jusèp Condò moric eth 5 d’agost de 1919 ara edat de 52 ans e siguec enterrat en Bossòst.

Mn. Jusèp Condò siguec collaborador de desparières publicacions literàries, autor d’importants poèmes en occitan, tanben escriuec condes cuerti, roman e teatre. En 1912, guanhèc eth Prèmi des Jòcs Floraus de Tolosa damb eth poemari Era Val d’Aran.

Dera sua vasta òbra destaque eth Vocabulari aranés, publicat en 1915. Jusèp Condò e Sambeat ei autor de Victòria des Aranesi; Ua ròsa polida; Era veu deth campanau; Luenh dera Pàtria; Cançon dera Garona; Era cunhèra; Sang nòble e sang deth poble; Jamès seigut; i Ath deuant deth Sant Crist de Salardú, entre d’auti.

Òme umil, damb un gran sens dera umor e trabalhador incansable, segontes eth retrait de Mn. Jusèp Amiell, eth Conselh Generau d’Aran creèc en 1989 eth Prèmi Mossèn Condò de roman e poesia en aranés en sòn aunor.