Vielha, 17 d’abriu de 2019.- Es editors e er arrevirador ar aranés d’“Es jòies dera Castafiòre” des aventures de Tintin, l’an presentada en Conselh Generau d’Aran.

Aguesta aventura deth jornalista mès coneishut deth cómic, que promet èster er exit de ventes aguest Sant Jordi ena Val d’Aran, a estat arrevirada ar aranés per Tònho Castet, damb era correccion d’Antoni Nogués e er assessorament de Jèp de Montoya.

“Es jòies dera Castafiòre”, nèish dera iniciatiua conjunta des editoriaus Trilita Edicions e Zephyrum Edicions, qu’an artenhut que Casterman Editions, que gestione es drets deth personatge de Hergé, autorize era publicacion de toti es albums de Tintín en diuèrsi idiòmes e dialèctes der Estat: galhec, basc, aranés, valencian, castúo (dialècte deth castelhan parlat en Extremadura) e aragonés (parlat sustot enes vals deth Pirenèu e que tanben se coneish coma fabla aragonesa).

Es editors Ana Zendrera (Edicions Zephyrum) e Albèrt Mestres (Edicions Trilita) an presentat era òbra ara conselhèra de Torisme d’Aran, Anna Díaz, que li an explicat qu’es pròplèus mesi s’editaràn dues naues aventures de Tintin en aranés “Objectiu era lua” y “Auem cauishigat ena lua“.

“Es jòies dera Castafiòre”, era prumèra aventura de Tintin en aranés, ja se pòt aquerir enes libraries dera Val d’Aran e tanben per internet en https://tintinshopbcn.com/Catalogui/novetats/ , a un prètz de 16,50 €.

Eth hèt qu’Es aventures de Tintín agen estat arrevirades, enquiara, a 121 idiòmes e dialèctes a ajudat fòrça ar exit deth personatge e hè a pensar que fòrça des tintinòlegs de tot eth mon tanben voleràn auer eth sòn exemplar en aranés.