Vielha, 22 de hereuèr de 2019.- Era sala Era Audiovisuau de Vielha s’aumplic entà assistir ara projeccion dera pellicula “CompartirXAprendre”, un video sus era experiéncia deth laueg deth Tuc dera Llança (2.658 m) deth passat 6 de hereuèr en que tres esquiaires se vederen estonadi quan practicauen esquí dehòra pista.

Era pellicula realizada peth guida de montanha Roger Martorell damb era collaboracion des tecnicians deth Centre de Prediccion de Lauegi deth Conselh Generau d’Aran, damb era narracion en prumèra persona d’un des esquiaires afectadi peth laueg, rebat era situacion que viueren es tres esquiaires ar èster estonadi pera nhèu.

Es imatges rebaten coma en un prumèr moment dus des esquiaires artenhen superar eth laueg, tot e que demoren semienterradi, e comencen era recèrca deth tresau esquiaire enterrat pera nhèu e localizat mejançant ARVA (Appareil de Recherche de Victimes d´Avalanches) e era rapida intervencion des companhs damb era sonda e era pala enquiara arribada deth GRM (Grop de Rescat de Montanha) des Pompièrs d’Aran que procedissen ath rescat e evacuacion en elicoptèr des victimes.

Eth GRM des Pompièrs d’Aran siguec avertit en madeish moment deth laueg peth guida de montanha que se mantenguec en tot moment en contacte damb es tecnicians deth Centre de Prediccion de Lauegi deth Conselh Generau d’Aran e damb era equipa de rescat. Fin finau, es esquiaires sigueren evacuadi en elicoptèr en Espitau dera Val d’Aran es dus prumèrs e eth tresau derivat en elicoptèr medicalizat en Espitau Arnau de Vilanova de Lhèida a on demorèc e siguec dat de nauta enes dies posteriors.

Era projeccion dera pellicula compdèc damb era preséncia des tecnicians deth Centre de Prediccion de Lauegi deth Conselh Generau d’Aran, eth guida de montanha Roger Martorell e dus des esquiaires afectadi peth laueg, acompanhadi entre d’auti peth conselhèr de Territòri d’Aran, José Antonio Boya. Dempús dera projeccion deth vidèo auec lòc un interessant collòqui damb era participacion deth public assistent sus es desparières situacions e era manèra d’actuar deuant un laueg ena montanha e dera importància de consultar eth bulletin de prevision de lauegi que cada dia emet eth Centre de Lauegi e era preparacion des gessudes, atau coma es mesures de seguretat que non se pòden desbrembar.

En aguest sens, eth conselhèr de Territòri, José Antonio Boya, destaquèc era rapida accion des Servicis de Pompièrs e Emergéncies dera Val d’Aran que, en pòques menutes, encara qu’en visionat dera pellicula se hèn etèrni, didec, poderen efectuar eth rescat des esquiaires gràcies ara sua formacion e experiéncia en rescats de montanha.

Eth vidèo complèt de “CompartirXAprendre” se poderà veir en You Tube enes pròplèus dies tau coma anoncièren es autors dera pellicula.