Deman, dissabte 27 de junhsèga, Bagergue celebrarà era sua proclamacion oficiau coma un des Pòbles mès Polits d’Espanha, dempús dera sua certificacion eth passat mès de gèr ena Hèira Internacionau de Torisme (FITUR) de Madrid.

Er acte començarà tàs 12:00 ores ena Glèisa de Sant Fèlix damb era benvenguda e presentacion deth president dera EMD de Bagergue, Marc Tarrau, e eth president dera Associacion des Pòbles mès Polits d’Espanha, Francisco Mestre.

Era jornada compdarà tanben damb es intervencions dera vicesindica d’Aran, Maria Vergés, era delegada deth Govèrn en Catalonha, Teresa Cunillera, er alcalde de Naut Aran, César Ruiz-Canela, e era directora de Musèus dera Val d’Aran, Carla del Valle.

En acabar es actes en interior dera glèisa i aurà ua mòstra de dances tradicionaus araneses, ua visita pera Rota des Espacis Floridi e se procedirà a descaperar eth pannèu. Fin finau, era EMD de Bagergue aufrirà as assistents un aperitiu de productes locaus.

Er eveniment servirà entà explicar era importància qu’a entà aguest petit pòble aranés formar part dera marca de qualitat que represente era Associacion des Pòbles mès Polits d’Espanha, e er impacte e projeccion que generarà a nivèu toristic.

“Cau felicitar ath pòble de Bagergue e ath sòn alcalde per aguesta distincion que tant meriten. Eth trabalh que, diàriament, amien a tèrme es alcaldes e alcaldeses aranesi ei, entath Conselh Generau d’Aran, clau tath desvolopament deth nòste país e ei just reconéisher-les-ac”, assegure era vicesindica d’Aran, Maria Vergés.

Bagergue ei un des onze naues poblacions qu’an passat enguan a formar part d’aguest hilat, eth quau compde dejà damb 79 pòbles.

Hònt: Associacion des Pòbles mès Polits d’Espanha

Imatges: Val d’Aran Photos e EMD Bagergue