Pont de Suert, 10 de mai de 2017.- Aué a agut lòc en Conselh Comarcau dera Nauta Ribagorça, era reünion de trabalh sus eth projècte transfronterèr de recuperacion deth Camin de Santiago, des de Saint Bertrand de Comminges a Roda d’Isábena pera Val d’Aran.

Se tracte d’ua prumèra reünion de trabalh entà desvolopar un nau producte d’impacte toristic e economic qu’englobarà diuèrsi territòris: França, era Val d’Aran, Nauta Ribagorça e era Ribagorza aragonesa.

Eth projècte, impulsat pera Associacion d’Amics deth Camin de Santiago ena Val d’Aran, preten dar ua projeccion toristica importanta enes comarques que hèn part ar incorporar un actiu coma aguest en sòn auviatge culturau.

Ara reünion convocada peth president deth Conselh Comarcau dera Nauta Ribagorça, Josep Lluís Farrero; a assistit eth sindic d’Aran, Carlos Barrera, acompanhat deth conselhèr de Territòri, José Antonio Boya; era presidenta dera comarca dera Ribagorza, Lourdes Pena; Alain Castel, president dera Communanté de Communes Pyrénnés Haut Garonnaises, atau coma bailes e representants des municipis implicadi.

Eth sindic d’Aran, Carlos Barrera, expliquèc qu’aguest ei un projècte que met en valor eth trabalh realizat per toti es territòris entà dar a conéisher ua part dera rota deth camin de Santiago qu’auie ja existit istoricaments ena Val d’Aran.

Barrera, a auançat qu’aurà ua pròplèu reünion eth 14 de junh, que ja se prepausarà en un huelheton informatiu deth Camin de Santiago, entà totes aqueres persones qu’ac volguen realizar, ath delà d’incorporar un questionari qu’arresponeràn es pelegrins entà melhorar eth servici. En tot ahíger qu’en pas peth tunèl de Vielha se poderie abilitar ua parada de transpòrt public collectiu ena boca nòrd, donques qu’en sud ja existís, e que se crearà un grop de trabalh que harà eth seguiment deth projècte globau.

Eth sindic d’Aran, a soslinhat qu’enes pròplèus reünions de trabalh se concretaràn tanben es possibles linhes de finançament entà dar viabilitat ath projècte iniciau e eth nòm comerciau dera rota. Ar èster un projècte transfronterèr se contemplen possibles linhes de trabalh coma eth programa de cooperación territoriau transfronterèr INTERREG a trauès des hons europèus FEDER, atau coma cercar aliances damb es Deputacions d’Òsca e Lhèida e era Agéncia Catalana de Torisme.

Pera sua part eth president deth Conselh Comarcau dera Nauta Ribagorça, Josep Lluís Farrero, destaquèc qu’eth Camin de Santiago, ei ua mèrca toristica fòrça assolidada a nivèu internacionau damb milions de consumidors finaus en tot eth mon. Donques, arténher un projècte d’aguesta envergadura supausarie refortilhar era integracion economica e sociau entàs comarques que hèn part, qu’ajudarie ara desestacionalizacion deth torisme de montanha.

Segontes es autors deth projècte, i a anotacions istoriques que mèrquen era Val d’Aran coma pas alternatiu des pelegrins que venguien de Saint Bertrand de Comminges, procedenti de Narbonne o de Toulouse, utilizauen eth territòri aranés entà crotzar era sarrada entà arribar entàs tèrres aragoneses. Aguest camin s’utilizèc principauments a fins dera Edat mieja quan eth pas de Somport se vedec afectat pes guèrres religioses entre hugonotes e catolics. En mapa francés de 1648 se mòstre eth pas de Saint Bertrand de Comminges en Vielha en direccion entà Barbastro coma ua via existenta. Donques, ei evident qu’eth pòrt de Somport a trauès de Jaca e era conca deth Gállego non sigueren es unics camins utilizadi pes pelegrins.