Qué ei Aran Accion 2020-2030?

Des deth Conselh Generau auem volut iniciar Accion Aran 20/30, un procès de debat dubèrt ara ciutadania entà consensuar entre toti possibles accions e linhes de trabalh que mos permeten afrontar, de manèra immediata, es besonhs deth moment, especificament en encastre economic e laborau.

Dempús d’auer organizat es grop de trabalh a on s’a debatut conjuntament de quina forma podem bastir un front comun en qué eth Conselh Generau e d’autes administracions publiques poguen somar-se-i e impulsar-lo amassa. Ja auem remassat fòrça informacion sus es interèssi de fòrça persones araneses qu’an idèes innovadores e pensen en iniciar naues activitats.

En cas deth sector toristic, qu’aglutine era major part d’empreses e activitat economica dera Val d’Aran, s’a daurit un procès especific e en parallèl entà trabalhar de forma urgenta es sòns besonhs mès immediats.

En globau, toti aguesti debats, an d’èster eth punt de partida d’un procès de mès long recorrut que mos permete generar un plan d’accion entà desvolopar un modèl territoriau de futur entara Val d’Aran.