• Proteccion Civiu barre era ALERTA deth plan NEUCAT mès manten eth Plan era situacion de Prealerta pera possibilitat de nheuades pendent es pròplèus dies

• Proteccion Civiu dera Generalitat manten era Prealerta deth Plan de Proteccion Civiu de Catalonha Procicat per fòrt vent pendent eth dia d’aué peth Pirenèu, Prepirenèu e er Empordan. 

Proteccion Civiu dera Generalitat a dat per finalizada era fasa d’Alèrta deth plan NEUCAT un còp an passat es nheuades que comencèren eth passat dimars 3 de hereuèr e s’an normalizat es principaus incidéncies que provoquèren, mès que mès pendent eth maitin deth dia d’ager. Totun, Proteccion Civiu manten eth plan NEUCAT en Prealerta a causa des previsions de naues nheuades pendent es pròplèus dies de maitiada a còtes baishes localaments ath litorau de Barcelona e Tarragona.

Segons a informat eth Servici Meteorologic de Catalonha SMC se da per finalizat er episòdi de nheuades qu’a debanat a compdar deth dimars dia 3 de hereuèr. Entà aguesta pròplèu maitiada se preve un nau episòdi de nheuades que pòt afectar ath litorau de Barcelona e pera maitiada de diuendres a dissabte ath litorau tant de Barcelona coma de Tarragona. Es precipitacions seràn isolades e en forme de plojat d’intensitat fèbla. Era còta de nhèu virarà es 400 mètres, maugrat que puntuauments pòt baishar fins es 200 mètres.

Eth Servici Catalan de Transit (SCT) contunhe demanant precaucion ena conduccion deuant es plaques de gèu que i pòden auer enes carretères a on ager nheuèc e tanben alèrte de possibles cunhèstres que pòden afectar era circulacion pera nhèu acumulada enes lateraus des vies e eth vent intens. En aguesti moments, s’enregistren aguestes afectacions en hilat viari:

C-28: Talhada entre Baqueira e era Peülla. Ath delà, ei obligatòri portar cadees entre era Peülla e Casa Sastrada
C-142b: obligatòries cadees entre Baqueira e eth Plan de Beret

Eth SCT arrebrembe que, laguens de condicions de nhèu/gèu, cau tier en compde es següentes recomanacions:

Condusir damb suavitat.

Non frenar bruscament.

Redusir era velocitat.

Aumentar era distància de seguretat.

Seguir es roderes deishades per auti veïculs.

Non auançar se non ei de besonh.

Portar es cadees per se son de besonh.

Quan quèn es prumèrs flòcs de nhèu, se produsissen es madeishi efèctes que quan quèn es prumères gotes de ploja (barreja d’aigua, povàs e grèish). E passe eth madeish quan era nhèu ei acabada de quèir.

En arrincar eth veïcul sus nhèu, pòt èster qu’es arròdes patinen e s’enfonsen. Entà evità’c, meter-les ena linha dreta e arrincar damb dusau, deishar anar fòrça lentaments era embragatge, en tot mantier ua acceleracion doça e constanta, e non mòir era direccion enquia qu’eth veïcul non sigue en movement.

Prealerta PROCICAT Vents

A banda dera nhèu e eth heired, Proteccion Civiu dera Generalitat manten era Prealerta deth Plan de Proteccion Civiu de Catalonha Procicat per fòrt vent. Pendent eth dia d’aué se pòden superar es 90 km/h en Pirenèu, Prepirenèu e er extrèm nòrd de Catalonha en Empordan a on es registres pòden superar es 125 km/h enes pròplèus ores. Eth vent pòt afectar quinsevolh còta, mès es raches mès fòrtes se produsiràn enes còtes nautes. Eth vent boharà de component nòrd.

Localaments se pòt produsir era queiguda de bèth objècte (mobiliari urban, arbrat…) A causa dera intensitat deth vent. En aguest sens se recomane extremar era precaucion.