Eth cabau deth Garona a artenhut un valor de 84 m3/s ath sòn pas peth Baish Aran (Bossòst).

Proteccion Civil dera Generalitat demane extremar es precaucions en entorn der arriu Garona e limitar es activitats en arriu e entorns.

Barranc de Vedreda (Val de Toran). Foto: Agents de Medi Ambient d’Aran

Proteccion Civiu dera Generalitat de Catalonha a activat era Prealèrta deth Plan Especiau d’Emergéncies INUNCAT per aument de cabau der arriu Garona. Segontes a informat Endesa Generación, eth cabau der arriu Garona a aumentat 84 m3/segons, en tot superar eth nivèu d’avís ar entorn der arriu.

Eth cabau der arriu Garona s’a incrementat pes ploges des darrères ores e peth desgèu dera nhèu acumulada enes còtes mès nautes, fòrça superior as valors abituaus d’aguesta sason der an.

Ena rèsta des arrius dera Val d’Aran eth cabau ei elevat en general sustot ena Val de Toran e Varradòs.

Proteccion Civiu dera Generalitat recomane extremar es precaucions ar entorn des arrius, sustot en arriu Garona.

     Barranc de Vedreda (Val de Toran). Foto: Agents de Medi Ambient d’Aran

Eth sindic d’Aran, Carlos Barrera, eth conselhèr de Territòri d’Aran, Jose A. Boya  e eth conselhèr d’Agricultura, Ramaderia e Medi Ambient d’Aran, Jose E. Arró amassa damb es Agents de Medi Ambient d’Aran s’an desplaçat enquiàs punts des arrius dera Val d’Aran a on eth cabau ei mès naut.

Carlos Barrera, sindic d’Aran a explicat: “En aguesti moments cau estar atents, non i a motius tà preocupar-se, mès demanam ara gent evitar es activitats ath torn des arrius. Per prevision, es Agents de Medi Ambient d’Aran se trapen enes punts mès conflictius der arriu Garona  e d’auti arrius coma eth barranc de Vedreda, ena Val de Toran “.      

Vielha, 8 de mai de 2018

Conselh Generau d’Aran: Núria Sanjuan

Hònt: Proteccion Civiu