Eth plan demore en situacion de Prealèrta pr’amor que maugrat qu’era situacion s’a estabilizat es cabaus encara son mès nauti de çò qu’ei abituau.

                               Eth vicesindic d’Aran, Luis Carlos Medina, explicant as mieis de comunicacion (ACN) era situacion deth Garona.

Proteccion Civiu dera Generalitat a desactivat era Alèrta deth Plan Especiau d’Emergéncies per Inondacions en Catalonha INUNCAT per aument des cabaus de bèri arrius de Catalonha. Eth plan, que s’activèc ager damb motiu der increment deth cabau der arriu Garona e d’auti arrius deth Pirenèu e de Ponent coma er arriu Segre, demore aué en situacion de Prealèrta pr’amor que maugrat qu’era situacion s’a estabilizat es cabaus encara son mès nauti de çò qu’ei abituau.

Cossent as informacions disponibles der Institut Cartogràfic e Geologic de Catalonha ICGC, eth Servici Meteorologic de Catalonha SMC e era Confederacion Idrografica der Ebre CHE, era disminucion des temperatures a frenat es aportacions deth desgèu des arrius, en tot provocar ua estabilizacion des cabaus des diferenti arrius de Catalonha, se preve qu’es manòbres de desembaussament enes cònques des arrius Garona, Segre e es Nogueres disminuisquen, e non se demoren per aué ploges considerables que poguen incrementar eth cabau des arrius qu’ores d’ara an tendéncia a disminuir damb es següenti valors:

Er arriu Garona, ath pas per Bossòst, a un cabau de 64,91 m3/s damb prevision de mantier-se estable.

Proteccion Civiu arrebrembe que cau mantier era vigilància ar entorn des arrius de montanha mès que mès deth Pirenèu e Prepirenèu Occidentau e de Ponent, pes sòns cabaus encara anautits, e èster atenti a possibles nauetats enes previsions de ploges e desgèu es pròplèus dies que poguen generar er increment d’aguesti cabaus. Es activitats en arriu se pòden veir condicionades peth risc que supausen es cabaus anautits.

Vielha, 30 d’abriu de 2018

Conselh Generau d’Aran: Núria Sanjuan

Hònt: Gencat/ Protecció Civil