Vielha, 12 d’abriu de 2017.- Pendent aguesta setmana s’an amiat a tèrme es pròves d’accès de pre-Tecnificacion de Snowboard, Esquí Aupin e Freeride, en Centre de Tecnificacion d’Espòrts d’Iuèrn dera Val d’Aran (CETEI), organizades peth Conselh Generau d’Aran, damb era collaboracion de Baqueira Beret, er Ajuntament de Vielha e Mijaran e deth madeish Centre de Tecnificacion.
Es jornades an compdat damb era participacion d’Albert Mallol Soler, seleccionador nacionau d’snowboard adaptat, deth freerider aranés Aymar Navarro e des tecnicians des programes deth CETEI.
Eth Centre de Tecnificacion Esportiua d’Espòrts d’Iuèrn dera Val d’Aran, restacat ara Reau Federacion Espanhòla d’Espòrts d’Iuèrn (RFEDI) e ara Federacion Catalana d’Espòrts d’Iuèrn (FCEH), a per objectiu ajudar ara progression de joenes promeses e velhar pera sua formacion integrau. Es esportistes seleccionadi arreceben formacion tecnica/esportiua e academica, ath delà d’un seguiment medicau/psicologic entà garantir un estat de salut adaptat entara practica esportiua e ua gessuda professionau de futur.
Es pròves an consistit enes avaloracions fisiques que s’an desvolopat ena sala polivalenta de Vielha, pròves tecniques des esportistes d’Esquí Aupin U16 e U18, pròves tecniques de Freeride e pròves tecniques de snowboard.
