Vielha, 9 d’abriu de 2018.- Pendent era dimenjada deth 7 e 8 d’abriu organizat peth CETEI (Centre de Tecnificacion d’Espòrts d’Iuèrn) Val d’Aran s’an amiat a tèrme ena estacion de Baqueira Beret es pròves d’accès enes programes de pre-tecnificacion d’espòrts d’iuèrn. Un totau de 45 esportistes des categories U14 e U16 s’an presentat as pròves dera sua modalitat: Esquí Aupin (23 esportistes), Snowboard (7 esportistes), Freeride (11 esportistes) e Freestyle (4 esportistes).

Aguestes pròves an coma objectiu era seleccion de talents entà formar eth grop der inici dera naua sason 2018-19 deth CETEI Val d’Aran. Es esportistes pòden gaudir der entrenament sistematizat pendent tota era sason, pr’amor que gràcies ath supòrt der INS d’Aran, pòden compdar damb era adaptacion der orari escolar damb era fin de desvolopar es entrenaments en pistes pendent tres maitins ara setmana.

D’aguesta manèra era formacion intègre er aspècte esportiu, academic e personau ath madeish temps.

Eth supòrt e era collaboracion de diuèrses entitats ei era clau entath desvolopament d’aguesti programes de formacion integrau des esportistes de nhèu. Es diuèrsi collectius trabalhen integralaments pendent tot er an entà amiar a tèrme era intencion des programes de pre-tecnificacion, damb eth supòrt deth Centre de Tecnificacion d’Espòrts d’Iuèrn e deth Conselh Generau d’Aran. Ath delà, tant pendent era sason 2017-18 e nauaments en inici dera sason 2018-19, s’a pogut compdar damb era collaboracion dera Deputacion de Lhèida.