• Eth passat dimars, dia 9, s’amièc a tèrme aguesta amassada ena qué preneren part era sindica d’Aran, Maria Vergés, e eth director generau de Prevencion, Extincion d’Incèndis e Sauvaments de Bombers dera Generalitat, Joan Delort, ena que, entre d’auti ahèrs, se tractèc sus era ressolucion deth contenciós presentat peth Conselh Generau d’Aran per incompliment der acòrd institucionau

Era sindica d’Aran, Maria Vergés presidic eth passat dimars era prumèra amassada dera Comission de Seguiment der acòrd institucionau de gestion integrau d’emergéncies en Aran, ena qué participèren eth director generau de Prevencion, Extincion d’Incendis e Sauvaments de Bombers, Joan Delort eth subdirector generau Operatiu, David Borrell, e eth subdirector generau d’Administracion e Recorsi Umans de Bombers, Joan Navarro, atau coma eth major des Pompièrs d’Aran, Manel Bosch.

Pendent aguesta amassada se tractèren ahèrs importants entara gestion des emergéncies ena Val d’Aran, atau coma era solucion entà revertir er incompliment der acòrd sus era aportacion dera Direccion Generau de Prevencion, Extincion d’Incendis e Sauvaments ath Conselh Generau entath proveïment de veïculs de Pompièrs, peth quau eth govèrn d’Aran presentèc, eth passat 12 de junhsèga, un recors contenciós deuant eth departament d’Interior.

En aguest sens, era sindica d’Aran a manifestat que “era volentat deth govèrn d’Aran ei trapar vies de solucion ad aguest conflicte basades ena leiautat e respècte institucionau, damb er objectiu de velhar pera seguretat des nòsti Pompièrs e de garantir ua gestion des emergéncies de qualitat en nòste territòri, e tanben ena rèsta de territòris vesins enes qu’eth còs de Pompièrs d’Aran balhe supòrt damb regularitat”.

Tanben se consensuèc era responsabilitat operativa enes intervencions enes quaus Pompièrs e Bombers actuen conjuntament, se parlèc sus era participacion en jornades formatives conjuntament damb parcs de Bombers deth Pirenèu e se regulèc eth compliment dera participacion d’Aran en aqueri aspèctes qu’afècten ara foncion que desvolòpe Pompièrs en territòri.