• Era sindica d’Aran s’a amassat telematicament damb eth secretari de Govèrns locaus e Relacions damb Aran e era directora generau de Pressupòsti dera Generalitat entà tractar sus es competéncies que, atau coma establís era Lei de Regim Especiau d’Aran, a d’assomir eth Conselh Generau e qu’encara non an estat assomides de forma efectiva, e revisar aqueres competéncies traspassades qu’an de besonh ua revision o melhora

Aguest maitin a auut lòc, telematicament, era prumèra amassada dera Ponéncia permanent en matèria de traspassi e convènis entre eth Conselh Generau d’Aran e eth nau govèrn dera Generalitat de Catalunya, presidida pera sindica d’Aran, Maria Vergés, e qu’a compdat damb era participacion deth secretari de Govèrns locaus e Relacions damb Aran dera Generalitat de Catalunya, era direccion generau de Pressupòsti dera Generalitat, e responsables d’aministracion generau deth Conselh Generau, entre d’auti.

“Era Ponéncia permanent en matèria de traspassi e convènis ei un òrgan de vitau importància entath desplegament dera Lei de Regim Especiau d’Aran e des competéncies qu’encara non an estat assomides de forma efectiva peth Conselh, que son era majoria des que recuelh era Lei”, afirmaue era sindica d’Aran, en tot híger que: “aué, en aguesta prumèra amassada, auem parlat sus es aspèctes qu’an de besonh ua revision e melhora en aqueres competéncies que dejà desvolope eth Conselh Generau d’Aran, e auem abordat tanben eth besonh urgent de revisar es competéncies en matèria de lengua e cultura araneses, ua competéncia que non s’a actualizat der an 1992 ençà, atau coma era d’atencion as persones, ahèrs sociaus e benèster, era gestion forestau o es espòrts qu’a dia d’aué non son desvolopades ”.

Aguest òrgan, constituït ena darrèra Comission Bilaterau deth Conselh Generau d’Aran e era Generalitat de Catalunya, a coma objectiu principau er impuls e era preparacion de prepauses de traspassi que s’agen d’elevar ath Plen dera Comission, atau coma er estudi de prepauses de convènis e e d’auti esturments de collaboracion entre andues institucions qu’afecten ara gestion des servicis non traspassadi.