Deth 20 ath 23 de seteme eth CDIA realizèc era prumèra concentracion des equipes de tecnificacion e deteccion- seguiment.
En aguesta prumèra concentracion, ath delà de pròves fisiques, se realizèren reünions individuaus damb toti es esportistes entà conéisher era sua disposicion e disponibilitat entath pròplèu cicle paraolimpic Pequin 2022.
Era passada dimenjada es equipes de tecnificacion e deteccion- seguiment deth Centre d’Espòrts d’Iuèrn Adaptat (CDIA) realizèren era sua prumèra concentracion en Complèxe Esportiu de Fadura de Getxo (Bilbao). Eth principau objectiu d’aguesta prumèra concentracion ère era realizacion de reünions individuaus damb toti es esportistes entà conéisher era sua disposicion e disponibilitat entath pròplèu cicle paraolimpic Pequin 2022 ath delà dera realizacion de pròves fisiques. Es tardes se destinèren ara realizacion d’autes activitats complementàries coma surf aplicat ath desvolopament e melhora dera tecnica des esportistes.
Eth dimenge, dia 23, auec lòc era darrèra session d’aprendissatge tecnic de naui movements de halterofilia entàs entrenaments fisics e, dempús d’un dinar que servie tà finalizar ues jornades intenses e plees de bon ambient e espòrt, es assistents marchèren as sues cases damb eth guardar metut ena imminenta sason d’iuèrn e ara següenta concentracion.
Tot açò a estat possible gràcies ara collaboracion dera Federacion Basca d’Espòrt Adaptat (FVDA) e ath Basque Team qu’an trabalhat amassa entà amiar a tèrme aguesta prumèra concentracion.
Eth CDIA ei un centre de naut rendiment, deteccion de talents, tecnificacion d’esportistes e formacion de tecnics esportius especialistes enes espòrts d’iuèrn entà persones apertenentes as Federacions Espanhòles de Discapacitats Fisics e Paralisi Cerebral.
Gràcies as sòns patrocinadors, institucions e collaboradors: era Fondacion Repsol, eth Consejo Superior de Deportes, Comitat Paraolimpic Espanhòu, Conselh Generau d’Aran, Deputacion de Lleida, Ajuntament de Naut Aran, Consell Català de l’Esport e damb era collaboracion d’Elan Esquís, Medilast, Mountain Padel Gim e Iberian Sportech entre d’auti, amien a tèrme cada an un trabalh multidireccionau que preten hèr arribar es espòrts d’iuèrn adaptat a totes es persones damb discapacitat e hèr possible as melhors arribar a formar part dera Equipa Nacionau e participar ath maximal nivèu internacionau.
Es sòns programes esportius van des dera tecnificacion ath naut rendiment, ath que se somen activitats de promocion der espòrt entà toti, hemna e espòrt adaptat, deteccion e formacion de talents e organizacion de competicions nacionaus.
Vielha, 2 d’octobre de 2018
Conselh Generau d’Aran: Núria Sanjuan
Hònt e Fotos:
Federación Española de Deportes de Personas con Discapacidad Física. FEDDF
Federación Española de Deportes de Personas con Parálisis Cerebral. FEDPC
CDIA ARAN Centro Nacional de Deportes de Invierno