• Eth sindic d’Aran e eth secretari Generau der Espòrt an manifestat eth sòn desir de mantier era cooperacion en matèria esportiua

• Boya a hèt evident eth besonh de qu’era naua Lei der Espòrt recuelhe era creacion dera Federacion Aranesa d’Espòrts d’Iuèrn

Eth sindic d’Aran, Francés Boya, s’a amassat damb eth secretari generau der Espòrt e era Activitat Fisica, Gerard Figueras. Ua prumèra prenuda de contacte a on s’an tractat diuèrsi ahèrs relacionadi damb er airau des espòrts ena Val d’Aran, especiaument en çò que pertòque as espòrts de competicion e er esquí.

Pendent era amassada Boya e Figueras an manifestat eth sòn desir de mantier era cooperacion en matèria esportiua e an abordat naues vies de collaboracion entà aprigondir ena promocion der espòrt.

Eth sindic e eth secretari generau der Espòrt s’an comprometut a desvolopar, de manèra conjunta un projècte que remasse es fortaleses deth territòri aranés deuant deth rèpte d’uns Jòcs Olimpics e Paralimpics d’Iuèrn e que comence a decidir ua estrategia tà qu’er espòrt esdevengue un pilar ena economia aranesa.

Atau madeish, Boya a hèt evident en aguesta prenuda de contacte eth besonh de qu’era naua Lei der Espòrt recuelhe era creacion desa Federacions Esportiues Araneses.