Era corporacion provinciau a liderat era implantacion en territòri d’aguest projècte europèu, que supause ua inversion de lèu 520.000 èuros
Eth Conselh Generau d’Aran acuelhec era setmana passada ua reünion interinstitucionau que supausèc era metuda en marcha enes tèrres de Lleida deth projècte europèu RisqHydro, deth hilat transfronterèr de deteccion de risqui idrologics.
Era session, siguec presidida peth vicepresident tresau dera Deputacion de Lleida, Pau Perdices, e peth conselhèr de Territòri, Eduardo Valdecantos. Compdèc damb participacion de representants de totes es entitats sòcies: era Communauté de Communes de Saint-Béat, eth Conselh Generau d’Aran e es conselhs comarcaus dera Alta Ribagorça, Alt Urgell, eth Pallars Jussà e eth Pallars Sobirà.
En transcors dera reünion, es representants des diuèrses institucions liderades pera Deputacion de Lleida constituïren eth comitat de gestion deth projècte, ratifiquèren es acòrds de partenariat e establiren es bases generaus entath corrècte desvolopament deth projècte.
RisqHydro ei un projècte dirigit pera entitat provinciau, mejançant eth sòn Patronat de Promocion Economica, e compde damb un pressupòst d’apròp de 520.000€. Aguesta iniciatiua, acceptada peth Programa d’Ajudes ara Cooperacion Transfronterèra Espanha-França-Andòrra, a coma objectiu establir un sistèma d’alèrtes mejançant era installacion d’un hilat de 30 sensors e estacions meteorologiques, atau coma era definicion de protocòus de Proteccion Civiu d’Alèrta per aiguats ara fin d’esvitar damatges personaus e redusir ath maximal es damatges materiaus a causa de possibles desbordaments des arrius.
En paraules deth conselhèr Valdecantos, “aguest projècte a coma finalitat previer es possibles emergéncies enes arrius dera Val d’Aran, en concrèt eth Garona. Era implantacion d’aguesti sensors balharà seguretat a totes aqueres activitats economiques que se trapen apròp der arriu, coma campings e diuèrsi espòrts d’aventura. Ath delà, crearà un hilat d’alèrtes, en cas d’ua venguda d’aigua, dat qu’auram informacion de tot eth cors der arriu, des d’on nèish enquia er aute costat dera termièra. S’emplegarà entà poder dar avís d’alèrta e emergéncia as poblacions que son plaçades Garona enjós. Aguesta informacion se poirà consultar ena plana Web deth Conselh entà coneishement dera ciudadania.”
Aguesti sistèmes de sensors s’installaran enes entèstes des arrius Garona, Noguera Pallaresa, Noguera Ribagorçana e Segre entà alertar der aument de cabau e ajudaràn a previer es possibles aiguats, coma es qu’afectèren ara Val d’Aran e part deth Pallars Sobirà e era Ribagorça ara pòc mès d’un an.
Era Deputacion de Lleida a aportat lèu de 250.000 èuros entà diferentes accions d’emergéncia coma conseqüéncia des aiguats que se produsiren ena Val d’Aran ara hè un an.