• Pendent era jornada de trabalh amiada a tèrme aué, era sindica d’Aran e era equipa de Pompièrs d’Aran s’an amassat damb eth contrôleur-général deth Servici Departamental d’Incendis e Rescat dera Haute-Garonne, damb qui an parlat deth besonh de crear un convèni de collaboracion entre es dus còssi de pompièrs, damb er objectiu d’establir un protocòl conjunt que garantisque ua melhor gestion des emergéncies en andús territòris

Era sindica d’Aran, Maria Vergés, acompanhada peth Major de Pompièrs, Manel Bosch, eth cap d’operacions de Pompièrs-Emergéncies, Eric Vilo, e d’auti professionaus deth Pompièrs d’Aran, an recebut aguest maitin ath contrôleur-général Sébastien Vergé, director deth Service Départemental d’Incendie et de Secours de Haute-Garonne (SDIS 31) des Pompièrs francesi, atau coma a d’auti membres deth SDIS 31.

En aguesta amassada s’a tractat sus eth besonh de crear un convèni de collaboracion entre andús còssi de pompièrs, damb er objectiu d’establir un protocòl conjunt que remasse totes es actuacions coordinades qu’enquiara s’an amiat a tèrme sense un marc normatiu, especiaument en matèria de catastròfes coma incendis o inondacions, entre d’autes.

Era sindica d’Aran a volut arregraïr “era visita e era predisposicion deth senhor Vergé e eth sòn equip entà trabalhar de manèra coordinada damb eth nòste còs de Pompièrs e auançar entà establir un convèni de collaboracion entre andús còssi de seguretat” e a destacat “era importància qu’a entara Val d’Aran mantier e garantir ua estreta collaboracion damb eth còs de Pompièrs deth país vesin, pr’amor dera istorica relacion qu’auem mantengut tostemp e que garantís ua melhor gestion des emergéncies entà ambdús territòris”.

Pendent aguesta prumèra visita oficiau deth contrôleur-général, ath delà d’amiar a tèrme era entrevista damb era sindica d’Aran, era equipa francesa a podut conéisher quina ei era estructura e foncionament deth nòste còs de Pompièrs, atau coma es sues installacions.