Vielha, 31 d’octobre de 2018.- Es camèras de fototrampa installades peth Conselh Generau d’Aran an captat es prumères imatges der os Goiat ena Val d’Aran dempús de qu’eth passat 16 d’octobre Agents e Tecnics deth Conselh Generau d’Aran, deth Còs d’Agents Ruraus e deth Departament de Territòri e Sostenibilitat en un dispositiu especiau li substituïssen eth colhar de localizacion GPS.

Per d’auta part, e en tot coïncidir en temps, er os Goiat, a realizat eth prumèr atac damb eth resultat d’ua oelha mòrta en sòn retorn ara Val d’Aran dempús d’auer passat es mesi d’estiu en França a on ataquèc 37 oelhes, un shivau, e 5 brinhons segontes confirmèren hònts deth govèrn francés.

Er atac ena Val d’Aran se produsic eth dimars pera net ena zòna de Margalida en Bossòst.

Eth colhar de localizacion GPS permet mantier era localizacion der exemplar liberat en Pirenèu laguens deth Programa PirosLife, e auer coneishença des sòns movements en tot disposar d’ua informacion absoludaments de besonh entà completar eth protocòu que permete fin finau era sua extraccion deth miei, s’atau se determine.

En aguest sens eth sindic d’Aran, Carlos Barrera, expliquèc qu’eth Protocòu d’intervencion damb ossi en Pirenèu, qu’empararie era extraccion de Goiat ja ei redactat e s’a enviat ath Govèrn centrau, ath d’Aragon e Navarra.

Se preve qu’enes pròplèus setmanes es ossi comencen eth periòde d’ibernacion, en tot coïncidir damb era baishada de temperatures.