Luís Carlos Medina, vicesindic d’Aran, siguec er encargat d’introdusir eth debat sus Euròpa celebrat eth darrèr diuendres pera net ena sala de premsa deth Conselh Generau d’Aran, que correc a cargue de Ferran Tarradellas, director dera Representacion dera Comission Europèa en Barcelona.

Tarradellas comencèc era sua intervencion en tot hèr ua brèu explicacion sus era creacion dera Union Europèa, dera sua estructura e des camèras de representants, entà contunhar en tot hèr ua revision sus quines son es preocupacions actuaus des ciutadans dera UE.

Laguens eth listat de preocupacions des europèus apareish en prumèr lòc era immigracion, seguit per aguest orde era situacion economica, eth deute public, eth terrorisme, era inflacion e eth cambiament climatic.

Un còp daurit eth debat, es assistents mostrèren eth sòn interès per aspèctes qu’afècten dirèctaments ara Val d’Aran atau coma dera situacion que viuen es aranesi e heren diuèrses aportacions. Se parlèc des problèmes sus fiscalitat a nivèu transtermierèr; deth besonh de reconeishença e omologacion de titolacions academiques per part dera UE e deth besonh d’unificar-les; deth besonh tanben d’unificar salaris e formacion des trabalhadors dera UE; des problèmes energetics, des còsti dera electricitat e dera praubesa energetica; e deth cambiament climatic e de com aguest pòt afectar ara Val d’Aran en un futur.

Ferran Tarradellas informèc as assistents qu’aguest tipe d’amassades ei ua comanda personau deth president dera Comission Europèa Jean-Claude Juncker, entà conéisher de prumèra man quines son es preocupacions e inquietuds de toti es abitants dera UE, per çò que d’aguesta amassada ena Val d’Aran, gesserà un repòrt que se remeterà as autoritats dera UE en Brusselles.