Vielha, 25 de junh de 2019.- Segontes informen es previsions de MeteoAran es pròplèus dies seràn mercadi pera escalada dera temperatura e harà fòrça calor en centre deth dia.

Era prevision anóncie qu’arribe ua ondada de calor damb temperatures de mès de 40 grads que se harà sénter ena dusau mitat dera setmana, e se mantierà enquiath dimenge.

Era prevision de MeteoAran ei qu’eth dimèrcles 26, pendent eth maitin contunharàn es bromalhs nauti. Pera tarde se formaràn bromes escampilhes e contunharà era preséncia de povàs nord-african. Vents loishi deth sud-est damb quauqua bohada moderada.

Temperatures fòrça nautes, que poderien superar eth recòrd istoric de maximes (17°/37° en Bossòst; 15°/36° en Vielha).

Eth dijaus 27, serà assolelhat damb calimes e quauque bromalh de desvolopament pendent era tarde. Vents fèbles deth sud.

Es temperatures contunharàn en tot èster fòrça nautes (18°/37° en Bossòst; 17°/36° en Vielha).

Deuant era ondada de calor cau seguir bères recomanacions.

Evitar gésser de casa pendent es ores centraus deth dia.

Béuer mès liquids (aigua e chuqui de fruta leugèraments heireds) e non demorar a auer besonh de béuer.

Evitar es minjars copiosi: minjar mens quantitat e mès còps ath dia.

Non préner minjars cauds ne abusar des bevendes alcooliques.

Redusir era activitat fisica.

Pausar damb frequéncia ara ombra.

Usar ròba de teishuts naturaus e leugèra.

Utilizar capèl, lunetes de solei e crèmes de proteccion solar.

Demorar en espacis ventiladi o condicionadi.

Pendent eth dia barrar es hièstres; daurir-les pera net entà ventilar. Mantier eth minjar en frigorific e susvelhar tostemp es mesures higièniques.

Non deishar laguens des veïculs a mainatges ne gent grana, ne animaus, damb es hièstres barrades.

Arrebrembar era proïbicion d’alugar huec en bòsc.