Alejandro Blanco e Carlos Barrera se placen a trabalhar amassa en projèctes coma era candidatura des Jòcs Olimpics d’Iuèrn Barcelona Pirineus 2026
Vielha, 30 de gèr de 2018.- Eth president deth COE (Comitat Olimpic Español) Alejandro Blanco, a dirigit era representacion de 20 des sòns membres qu’an visitat era Val d’Aran.
Era visita dera delegacion deth COE a començat ena estacion d’esquí de Baqueira Beret a on es membres deth Comitat Olimpic an coneishut de prumèra man eth trabalh que realizen en Centre de Tecnificacion d’Espòrts d’Iuèrn dera Val d’Aran (CETEI) es joeni esportistes e tecnics, amassa damb es responsables des clubs aranesi d’esquí.
Pera tarde a agut lòc era recepcion oficiau ena sedença deth Conselh Generau d’Aran, qu’i an participat eth sindic d’Aran, Carlos Barrera e eth president deth Comitat Olimpic Español, Alejandro Blanco, acompanhadi peth president de Baqueira, Aureli Bisbe, eth president dera RFEDI, May Peus, eth president dera FECH, Oscar Cruz, eth vicesindic d’Aran, Luís Carlos Medina e era conselhèra de Torisme e Desvolopament Economic d’Aran, Anna Díaz.
Eth president deth COE, Alejandro Blanco, a arregraït era possibilitat qu’eth Conselh Generau d’Aran a brindat ath Comitat Olimpic Español de conéisher eth trabalh que se realize ena Val d’Aran e poder veir e sénter ath costat des joeni esportistes deth CETEI era sua passion per esquí. Blanco, qu’a destacat es valors dera formacion en espòrt, a ahijut que çò que se demòstre ei que “quan s’a eth madeish objectiu, somar ei facil”.
Pera sua part eth sindic d’Aran, Carlos Barrera, a arregraït era preséncia des membres deth COE ena Val d’Aran e eth reconeishement deth sòn president ar esfòrç que se realize per part de Baqueira Beret e deth madeish Conselh Generau d’Aran a trauès deth CETEI. Barrera, li a demanat ath president deth COE que restanque ena retina çò qu’a vist ena Val d’Aran damb er objectiu metut ena candidatura olimpica Barcelona Pirineus 2026, pr’amor qu’a dit, “ei un ahèr de volontat e d’oportunitat”. Eth sindic d’Aran, a acabat era sua intervencion confiat en qu’es membres deth COE, damb Alejandro Blanco ath deuant seràn es melhors ambaishadors dera Val d’Aran entara candidatura olimpica.
Pera sua part eth president de Baqueira Beret, Aureli Bisbe, a destacat era implicacion dera estacion damb er esquí de competicion, damb es sèt clubs aranesi e damb eth Centre de Tecnificacion dera Val d’Aran, çò qu’a plaçat a toti es presents a impulsar projèctes conjunts.
Reconeishement deth Comitat Olimpic Espanhòl ath Conselh Generau d’Aran e ath president dera RFEDI May Peus
Eth president deth COE, Alejandro Blanco, a hèt liurament de reconeishences olimpiques ath sindic d’Aran, Carlos Barrera e ath president dera RFEDI, er aranés May Peus. Alejandro Blanco a destacat eth prètzhèt de May Peus deuant dera Reau Federacion Espanhòla d’Espòrts d’Iuèrn pera introduccions de naues linhes de trabalh qu’arreconeishen e prèmien er esfòrç des esportistes dera federacion, en tot ahíger qu’un des majors rèptes as que pòt aspirar e veir complit quinsevolh esportista que sigue ei eth de representar en sòn país en uns JJ.OO.
Pera sua part May Peus a arregraït eth hèt qu’eth Comitat Olimpic Espanhòl age visitat era Val d’Aran pòc abans de que donguen començament es JJ.OO e Paralimpics d’iuèrn 2018 de Pyeongchang en Corèa deth Sud. May Peus a volut dedicar aguest reconeishement as aranesi que luten pes espòrts d’iuèrn e as esportistes olimpics dera Val d’Aran.
Justaments eth sojorn des membres deth COE ena Val d’Aran a finalizat damb ua visita ath Musèu dera Nhèu, ena localitat aranesa d’Unha, a on a agut lòc un acte de reconeishement as esportistes olimpics aranesi: Andrés Ribèra March (1952 Oslo e 1956 Cortina d’Ampezzo); Rafael Mombiedro Giró (1952 Oslo); José Moga Aura (1956 Cortina d’Ampezzo); Eva Moga Domingo (1988 Calgary); Javier Ubeira Rubio (1992 Albertville e 1994 Lillerhammer); Alex Puente Tasias (2014 Sochi).
