Era Generalitat de Catalunya a arreconeishut 141 esportistes e equips dera demarcacion de Lleida qu’obtengueren un èxit destacat pendent eth cors 2013 en es sues respectives especialitats es competicions d’encastre catalan, estatau e internacionau. Er acte, celebrat en Teatre La Amistat de Mollerussa, a estat presidit peth secretari generau der Espòrt, Ivan Tibau, acompanhat deth president dera Deputacion de Lleida, Joan Reñé, entre d’autes autoritats.

Des 141 guerdons, 121 an corresponut a esportistes individuaus (84 òmes e 37 hemnes) e 20, a equips. Apartien a 58 clubs e entitats (50, lheidatans) e se n’includissen es 30 disciplines esportiues o federacions. En an 2013, entre toti es esportistes premiadi, tant es de categories individuaus coma es integrants d’equips, s’artenheren 73 medalhes en Campionats de Catalunya, 121 medalhes en Campionats d’Espanha (59 d’aur), 25 medalhes en Campionats d’Euròpa (8 d’aur) e 6 medalhes en Mondiaus (2 d’aur).

Bèri uns des esportistes distinguidi qu’an compartit guerdon damb eth joen aranés, Tòn Cónsul, an estat es frairs Márquez, Isidre Esteve o Jackson Quiñónez. As esportistes e clubs premiadi se les a liurat ua reproduccion dera òbra der artista lheidatan Sandoval titolada “Esprint”, elaborada entara escadença damb ua tecnica mixta de grauadi.

Eth vicesindic d’Aran e conselhèr d’Espòrts, Luís Carlos Medina, a manifestat “era Val d’Aran gaudís d’un moment esportiu incredible, er esfòrç des nòsti joeni da es sòns fruts e er anautit nombre d’esportistes aranesi que se trapen en tot hèr concurréncia ath mès naut nivèu meten en evidéncia qu’eth nòste país ei idonèu entara practica der espòrt” ath delà Medina a ahijut “ei un orgulh entà Aran veir a Tòn entre es melhors, ei era recompensa ara sua constància”.