Er Estat francés a decidit redaurir eth pas termierèr entre Espanha e França deth Portilhon, un mes dempús des atemptadi de París. Encara qu’eth plan d’emergéncia en França ei de tres mesi, eth Govèrn francés a decidit hèr ua excepcion en cas deth Portilhon, mès se mantieràn contraròtles antiterroristes que non seràn fixi.

www.panoramio.com

Eth conselhèr de Territòri deth CGA, José Antonio Boya, s’amassèc hè uns dies damb es responsables policèrs francesi a fin de trobar ua solucion entara redubertura deth pas termierèr deth Portilhon. En cas des contraròtles deth pas termierèr de Pònt de Rei, es autoritats franceses an informat que se haràn mès rapidaments, en tot dar responsa as informacions arrecebudes per part des autoritats araneses sus es coes que se formauen e eth temps de demora qu’ère de mès de mieja ora. Cau arrebrembar qu’eth de Pònt de Rei, ei un pas fòrça transitat per camions de merces, ath delà de toristes e visitantes e usatgèrs abituaus.

Eth sindic d’Aran, Carlos Barrera, a mostrat era sua satisfaccion pera bona notícia dera redubertura deth pas termierèr deth Portilhon, donques que “d’aguesta manèra s’acabe damb era preocupacion qu’an viscut aguestes setmanes es aranesi e concrètaments es ciutadans deth Baish Aran e sustot eth pòble de Bossòst”.