Eth relòtge mecanic deth campanau dera glèisa de Sant Fèlix de Vilac a retornat dempús qu’era passada tardor s’envièc a restaurar.

Se tracte d’un magnific relòtge mecanic, de hèr hargat e de granes dimensions, parièr ath que se pòt veir ena glèisa de Garòs que pòrte era data de 1714.

Maugrat qu’en cas de Vilac, non i a cap tipe d’inscripcion, pes sues caracteristiques tecniques se pòt considerar ua òbra deth madeish talhèr que hec eth de Garòs.

Coma es relòtges de Garòs e d’Escunhau, a estat restaurat per Howard Bradley, gran especialista en relòtges istorics.

Pr’amor qu’eth campanau de Vilac ei er unic campanau visitable, laguens dera Rota Romanica d’Aran, en aguest cas, s’a tornat a installar en sòn lòc abituau deth campanau a on se poirà compréner eth sòn foncionament e era importància qu’auie auut coma esturment qu’organizaue e mercaue era vida de tot eth pòble.

En paraules deth cap de Cultura e Patrimponi d’Aran, Jèp de Montoya, “era restauracion des relòtges des campanaus dera Val d’Aran ei ua des prioritats deth Departament de Cultura e Patrimòni damb er objectiu de poder arténher qu’Aran sigue patrimòni dera Umanitat”.