Vielha 3 de junh de 2016.- Eth Conselh Generau d’Aran, hè publics es donades dera sason d’iuèrn de 2016, comprenuda entre es mesi de gèr a abriu, damb es resultats obtengudi peth servici de recuelhuda de residus municipaus en aguest periòde.

Eth volum de dèishes gestionades pendent aguest periòde mòstre un petit increment de 1,62%, en tot passar de 2.649tn a 2.692tn, cossent damb era activitat toristica que s’a mantengut ar auce moderadaments respècte ar an 2015.

Aguest creishement, ei mès significatiu se s’obsèrve qu’eth volum arrecuelhut  selectivaments a creishut 14,66%, en tot passar de 526tn a 603tn, e eth volum de materiau de rèste, ei díder eth quau encara non se separe selectivaments, baishèc 1,61%, de 2.123tn a 2.089tn.

Totes es fraccions arrecuelhudes selectivaments an vist incrementat eth sòn volum, en tot destacar en mès de un 20% eth papèr carton e era fraccion organica.

Er estudi dera evolucion deth detalh de creishement des desparières fraccions des residus, aumenten es motius entara satisfaccion donques qu’eth percentatge de creishement que se n’a arrecuelhut selectivaments a creishut en 2,54%, en tot passar de representar 19,87% en 2015 a 22,41% enguan 2016.

Eth conselhèr de Territòri deth Govèrn d’Aran, José Antonio Boya, a manifestat que “aguestes chifres vien a demostrar qu’es ciutadans, cada viatge prenen mès consciéncia dera importància de preservar er entorn que les entornege, valor de principau importància entath desvolopament sostenible e equilibrat des desparières activitats toristiques e empresariaus que representen era principau activitat economica dera Val d’Aran “.

José Antonio Boya, a ahijut que “er an 2015 eth Conselh Generau d’Aran se dotèc, mejançant era enterpresa concesionaria Romero Polo SAU, de naui equipaments qu’an permetut aufrir un melhor servici as ciutadans e visitants. Era melhora ena recuelhuda selectiva des residus generadi, non aurie estat possible sense era imprescindibla collaboracion ciutadana, qu’a estat eth motor fonamentau entà arténher quòtes de recuelhuda selectiva comparabla as nivèus d’autes comarques a on hè ans s’obtien percentatges sensiblemente mès nauti qu’es dera Val d’Aran en recuelhuda selectiva des residus municipaus”.