Eth conselhèr de Territòri d’Aran, Eduardo Valdecantos, amassa damb er assessor tecnic deth Conselh Generau d’Aran en matèria de recuelhuda de residus ena Val d’Aran, Josep Ma. Insausti, an presentat en Conselh Generau d’Aran es resultats dera recuelhuda selectiva pendent er an 2014.
Valdecantos a afirmat “es resultats son boni e açò ei gràcies ara implicacion de toti es vesins d’Aran. Ara mos cau contunhar explicant era importància de hè’c pr’amor qu’era responsabilitat des dèishes ei de qui les produsís”.
Entà per’mor de hèr préner consciéncia ara gent sus era recuelhuda selectiva, pendent tot er an 2014 s’an realizat reünions informatives en toti es municipis dera Val d’Aran.
En aguestes reünions, eth Govèrn aranés informèc der ampliament deth servici, es naues ubicacions des isles de contienedors de veire, papèr, envasi, organica e, se facilitèc a toti ferrats e bosses especifiques entara separacion dera fraccion organica, atau coma imans damb explicacion deth contengut de cadua des fraccions damb es informacions qu’era Agéncia de Residus de Catalonha a a disposicion des usatgèrs ena sua web.
Valdecantos a hijut “des der inici dera nòsta legislatura, aguest ère un des objectius qu’auíem d’arténher. Un país coma eth nòste, qu’ath delà, vò èster destinacion toristica e, qu’amasse fòrça visitants, a de dar responsa e solucions ara gestion des residus”.
Tot eth materiau, atau coma es iglós que mancauen entà acabar es isles de contienedors, signifiquèren un esfòrç economic entath govèrn aranés de mès de 50.000€.
Pendent er an 2014 s’a arrecuelhut:
– Organica: 59,90 Tones
– Envasi: 124,46 Tones
– Papèr/carton: 352,37 Tones
– Veire: 478,78 Tones
TOTAL SELECTIVA: 1.015,51 Tones
– Rèste: 5.161,58 Tones
TOTAL RESIDUS: 6.177,09 Tones
Mès informacion: resultats selectiva 2014
Tanben s’a presentat era naua concesionaria deth servici de recuelhuda ena Val d’Aran, Romero Polo, S.L.
Entà finalizar, an autrejat es prèmis deth concors “ARAN RECICLE” de Catalonha Ràdio.
En paraules deth conselhèr, Valdecantos “damb aguest tipe de concors volem hèr préner consciéncia deth besonh de reciclar e reutilizar es materiaus deth nòste entorn”.