• Eth Conselh Generau d’Aran, damb era collaboracion dera Generalitat de Catalunya, encarguèc era restauracion d’aguesta escultura, part der auviatge culturau aranés, qu’ei dejà plaçada en sòn lòc abituau

Dempús dera sua restauracion pendent es darrèri mesi de 2020, dejà a retornat tara glèisa de Santa Maria d’Arties era imatge gotica de Sant Jaime.

Dempús dera restauracion amiada a tèrme, resulte evident era similitud des caracteristiques qu’aguesta imatge e era de Sant Joan Baptista, plaçades as dus costats der autar major dera glèisa, presenten: uelhs clari e ametladi, peu ròi, carnacions clares e rosades, celhes arcades e nas fin e rècte, en tot evidenciar qu’andues òbres pertanhen ath nomentat grop deth talhèr de Comenge (s. XIII-XIV).

Damb aguesta restauracion, qu’auec lòc enes installacions deth Centre de Restauracion de Bens Mòbles de Catalunya, se retirèren es repintats moderns, en tot deishar ath descubèrt era policromia originau, se rectifiquèc era union deth braç damb era man dreta e se dotèc ara imatge de major estabilitat.