• Eth 10 de junhsèga era Val d’Aran acuelherà era gessuda dera nauau etapa deth Tour de França 2016 (Vielha- Arcalís).

Era sedença deth Conselh Generau d’Aran a acuelhut aguest maitin era reünion de seguretat e coordinacion entre es còssi e fòrces de seguretat en itinerari dera nauau etapa deth Tour de França deth 10 de junhsèga damb gessuda de Vielha e arribada en Arcalis (Andòrra) damb 184.5 Km e 5 pòrts de montanha.

Era reünion a estat presidida peth vicesindic d’Aran e conselhèr d’Espòrts, Luis Carlos Medina, peth conselhèr de Territòri d’Aran, Jose Antonio Boya e peth comissari generau responsable des gessudes deth Tour de França, Yannick Goasduff, damb era preséncia deth director generau des Mòssos d’Esquadra, Albert Batlle, de representants dera organizacion deth Tour de França, Jean-Louis Pagès e Bertrand Charrier, deth director de la Volta Ciclista Catalonha, Ruben Peris, ath delà de representants des fòrces e còssi de seguretat Gendarmerie Nationale, Garde Républicaine, Police Nationale, Mòssos d’Esquadra, Policia Nacionau e Guardia Civiu.

En paraules deth vicesindic d’Aran e conselhèr d’Espòrts, Luis Carlos Medina “a estat ua reünion damb fòrça bona sintonia entre es Administracions e es fòrces e còssi de seguretat. Eth Conselh Generau d’Aran e eth Departament d’Interior an metut sus era taula toti es aspèctes de viabilitat e seguretat entara gessuda deth Tour de França eth 10 de junhsèga”.

“Eth trabalh a estat un exit e hè evidenta era professionalitat e coneishements des implicadi, trabalharam entà garantir era maximala eficiéncia e seguretat en aguest eveniment tant important” a hijut Medina.

Vielha, 5 d’abriu de 2016

Conselh Generau d’Aran: Núria Sanjuan