Aué dijaus, 26 de noveme, s’a amassat era Comission d’Ahèrs Institucionaus ena que i an assistit eth sindic d’Aran, Carlos Barrera, eth vicesindic d’Aran, Luis Carlos Medina, e es pòrtavotzes des formacions politiques dera oposicion, José Antonio Bruna (PRAG) e Amador Marqués (PSC-UA).

Entre d’auti ahèrs s’a dat coneishement sus er acòrd dera “Subcomisión de seguimiento normativo, prevención y solución de conflictos de la comisión bilateral Generalitat- Estado en relación con la Ley de Catalunya 1/2015, de 5 de febrero, del régimen especial de Aran” de conformitat damb es negociacions prèvies celebrades peth Grop de Trabalh constituït per Acòrd dera Suscomission entar estudi e prepausa de solucion des discrepàncies manifestades en relacion damb es articles 5, 8, 48 e 53, Disposicion addicionau prumèra, Disposicion addicionau dusau e Disposicion addicionau finau quinta dera Lei 1/2015, de 5 de hereuèr, deth règim especiau d’Aran, ambdues parts les considèren solventades en çò que tanh as sòns preceptes.

Cau soslinhar que damb aguest Acòrd se mantíen articles fonamentaus de contengut dera Lei d’Aran coma eth dera non inclusion d’Aran en cap division territoriau ne administrativa de Catalunya que non sigue era madeisha. Tanben se manten er ambit competenciau, eth dret a decidir e eth procés informatiu sus eth contengut d’aguesta Lei.

En relacion ar usatge preferent der aranés s’a interpelat coma ua mesura de proteccion a ua lengua en recession e damb fòrça perilh ena sua pervivéncia e non coma un rang d’usatge preferent peth desús deth castelhan o catalan, argument que s’expausèc entà esvitar era sua impugnacion, tot e que dejà ei recorrut damb ocasion deth recurs d’inconstitucionalitat interposat contra era Lei 35/2010, der occitan, aranés en Aran pendent de resolucion.

Es arguments d’aguest Acòrd sigueren debatudi pendent era amassada dera representacion dera “Subcomisión de seguimiento normativo, prevención y solución de conflictos de la comisión bilateral Generalitat- Estado en relación con la Ley de Catalunya 1/2015, de 5 de febrero, del régimen especial de Aran” qu’auèc lòc eth passat mes de seteme ena sedença des Servicis Juridics Centraus dera Generalitat de Catalunya en Barcelona ena que tanben participèren eth sindic d’Aran, Carlos Barrera, eth vicesindic d’Aran, Luis Carlos Medina e d’auti representants deth Conselh Genereau d’Aran.

Damb er Acòrd s’evite era interposicion de recurs d’inconstitucionalitat per part dera Administracion der Estat.