Vielha, 3 de juriòl de 2017.- Era Comission Territoriau d’Urbanisme dera Val d’Aran, co-presidida peth director generau d’Organizacion deth Territòri e Urbanisme, Agustí Serra e eth sindic d’Aran, Carlos Barrera, a celebrat ua naua session aguest maitin ena sedença deth Conselh Generau d’Aran.

Era Comission d’Urbanisme a tractat entre d’auti ahèrs, era aprobacion dera ampliacion des installacions des Banhs d’Arties, e era reforma e ampliacion deth pàrrec d’Orri Moet Winter.

S’a dat lum verda ath bastiment d’un parcatge provisionau de 20 places en carrèr Sant Jaume, 22 de Les.

Fin finau, tanben s’an avalorat tres alternatiues presentades de consulta d’avaloracion ambientau deth Plan especiau urbanistic entà implantar era activitat d’un camp de tir en Vilamòs e Es Bòrdes. En aguest sens, Agustí Serra, a explicat que s’a prepausat que tota era activitat sigue desvolopada en solèr preventiu e non pas en solèr protegit.

Serra a explicat que pendent era Comission d’urbanisme s’a dat compde des competéncies urbanistiques dera Val d’Aran laguens dera Lei d’Aran, qu’eth Conselh Generau d’Aran passe a auer un papèr de prumèr orde e s’assolide atau eth tresau àmbit singular de tramitacion urbanistica de Catalonha coma son er Ajuntament de Barcelona, er Airau Metropolitan de Barcelona e ara era Val d’Aran.

Ath finalizar era reünion dera Comission d’Urbanisme, eth sindic d’Aran, Carlos Barrera, expliquèc qu’era d’aué a estat era darrèra reünion dera Comission en format actuau, pr’amor que dempús des acòrds prenudi ena darrèra session dera Comission Bilaterau Govèrn dera Generalitat- Conselh Generau d’Aran, un des acòrds que se preneren siguec eth de potenciar eth Burèu Tecnic deth Conselh Generau d’Aran, en tot aplicar era volontat dera Lei d’Aran. Atau, a compdar d’ara es Servicis Tecnics deth Conselh Generau seràn qui elabòren es prepauses de resolucion e d’acòrds dera Comission d’Urbanisme.

D’aguesta manèra, didec Barrera, s’artenhen dus objectius, eth prumèr qu’es municipis d’Aran veiguen coma referéncia d’aqueri expedients qu’an d’èster sometudi ara aprobacion dera Comission d’Urbanisme as servicis Tecnics deth Conselh Generau d’Aran, pr’amor qu’es expedients se poderàn tramitar a trauès d’aguest madeish Burèu Tecnic o coma enquia ara enes Servicis Territoriaus d’Urbanisme de Lhèida. D’autra banda açò comportarà ua relacion mès fluida e agila des Servicis Tecnics e enfortís era estructura deth Burèu Tecnic deth Consellh Generau.

Es desparièrs departaments deth Conselh Generau d’Aran tanben seràn es encargadi d’elaborar es informes sectoriaus enes àmbits qu’an competéncies, coma es religadi damb informes tecnics d’auviatge, de cultura o de Miei Naturau per exemple.

Avantprojècte dera Lei de Territòri de Catalonha

Pera tarde eth director generau d’Organizacion deth Territòri e Urbanisme, Agustí Serra, expliquèc deuant bailes e tecnics d’urbanisme dera Val d’Aran, er avantprojècte de Lei de Territòri. Serra, afirmèc qu’aguesta naua lei que se ne comencèc eth procès de tramitacion formau eth passat 14 d’abriu, aurà fòrça transcendéncia en çò que tanh as modèls de ciutats e deth territòri en un futur.

Serra a resumit en 10 es objectius dera naua lei, damb era intencion de fomentar era transparéncia, impulsar un registre de planejament, en tot ahíger qu’ei un projècte de lei que refortilhe eth papèr des foncionaris.

Es dètz punts qu’a hèt mencion son: integrar era legislacion en matèria d’organizacion deth territòri (integrar 4 legislacions: planificacion territoriau, urbanisme, païsatge e urbanizacions en 1 soleta); abordar era diuersitat territoriau de Catalonha; priorizar eth reciclatge urban; adaptar e flexibilizar era planificacion en contèxt temporau; melhorar era eficiéncia e era competitivitat deth sistèma territoriau; fomentar ua major integracion des variables sociaus, economiques e ambientaus; planificar es espacis dubèrti; gestionar eth parc edificat enes espacis dubèrti; integrar eth païsatge transversalament e abordar es urbanizacions damb deficits.

Serra a ahijut qu’abordar era diuersitat territoriau ei ua veritabla obsession des responsables deth Govèrn e qu’era intencion finau ei qu’aguesta futura lei sigue generica damb tanti reglaments coma sigue de besonh.