Conselh e bailes demanaràn ara Confederacion Idrografica der Ebre (CHE) proïbir activitats en arriu Garona quan sigue superior as 80 m3/s
Es allegacions dera Generalitat e Conselh Generau entara N-230 prepausaràn eth bastiment d’un tunèl de 5,2 km des deth Parador de Vielha enquia Pont d’Arròs
Vielha, 9 de mai de 2018.- Eth Conselh de bailes dera Val d’Aran amassat ager acordèc reclamar ara Confederacion Idrografica der Ebre es inversions de defensa pendenti dempús der aiguat de 2013 enes pòbles de Les, Bossòst e Vielha. Atau madeish, ath finalizar era reünion, eth sindic d’Aran, Carlos Barrera, expliquèc que demanaràn ara CHE era creacion d’un protocòu entà proïbir activitats en arriu Garona quan eth cabau sigue superior as 80m3/s, pr’amor qu’expliquèc qu’ager madeish, quan er arriu superaue es 95 mètros cubics se vedec a tres persones en tot navegar en kayak per arriu ath sòn pas per Bossòst, conducta qu’eth sindic qualifiquèc de fòrça perilhosa.
Per d’auta part, eth sindic d’Aran, Carlos Barrera, confirmèc qu’eth periòde de presentacion d’allegacions ath projècte de melhora dera N-230 prepausat peth Ministèri de Foment s’a ampliat enquia finaus d’aguest mes de mai.
Eth sindic expliquèc qu’ena darrèra reünion en Departament de Territòri e Sostenibilitat dera Generalitat se decidic que se presentaràn allegacions desfavorables entàs quate prepauses presentades per Foment e qu’entà poder garantir er objectiu que mentre se hèsquen es òbres deth tram dera carretèra entre era boca nòrd deth tunèl de Vielha e Aubèrt age era minima afectación possibla ara circulacion jornalièra de veïculs, se presentarà ua prepausa de bastiment d’un tunèl des dera nautor deth Parador de Vielha enquia Pont d’Arròs, pr’amor que d’aguesta manèra non s’afectarie a cap nuclèu abitat e er impacte ambientau e visuau demorarie eliminat damb eth bastiment d’aguest tunèl, qu’aurie ua longitud de 5,2 km, fòrça semblanta ara der actuau tunèl de Vielha.
Maugrat açò, eth sindic tanben expliquèc qu’encara demorarie pendent de solucionar quin aurie d’èster era accion des dera boca nòrd deth tunèl de Vielha enquiara nautor deth Parador. Barrera, didec qu’eth Departament de Territòri trabalhe en ua prepausa de via segregada dera N-230 qu’anarie entre er arriu Nere e er actuau traçat dera carretèra N-230 enquiath Parador.
Eth sindic d’Aran ahigec que des deth Conselh Generau d’Aran se presentarà ua prepausa que permete èster çò mès respectuós damb er entorn naturau d’Aran e damb er auviatge, sense preténer cercar era rendabilitat deth còst des infrastructures, pr’amor qu’eth Conselh Generau d’Aran li cau trabalhar entà garantir era pervivéncia dera Val d’Aran coma destinacion toristica e pes interèssi generaus des aranesi, e que damb aguesta prepausa se garantisque qu’en rèste deth traçat dera carretèra enquiara termièra damb França se mantengue era filosofia des prepauses que ja presentèc eth Conselh Generau d’Aran en 2002, en tot mantier era possibilitat de bastir es variantes de Les e Bossòst e de gestionar era carretèra d’ua manèra civilizada e acceptabla.
