Eth conselhèr confirme era decision dera retirada der os Goiat deth miei

Territòri realizarà un estudi prealable des besonhs d’abitatges de prumèra residéncia en Aran en modalitat de loguèr accesible

Eth sindic d’Aran demane ua accion de maxima urgéncia entara canalizacion des aigües der airau afectat per esbauçament deth vessant dret der arriu Valarties

Vielha, 25 d’agost de 2018.- Aué dissabte, ena sedença deth Conselh Generau d’Aran, eth sindic d’Aran, Carlos Barrera, s’a amassat damb eth conselhèr de Territòri e Sostenibilitat dera Generalitat de Catalonha, Damià Calvet, entà analisar tèmes d’interès comun, principauments: biodiversitat, urbanisme, infrastructures o abitatge.

Ara reünion tanben an assistit, Marta Subirà, secretària de Miei Ambient e Sostenibilitat, Xavier Reinaldos, cap de gabinet deth departament Territòri. En representacion deth Conselh Generau d’Aran an estat presents, eth vicesindic d’Aran, Cesar Ruiz Canela, eth conselhèr de Territòri, José Antonio Boya, conselhèr d’Agricultura, Ramaderia e Miei Naturau, José Enrique Arró, conselhèra de Torisme e Desvolopament Economic, Anna Díaz, eth cap de gabinet, Pau Perdices, e eth tecnic deth departament de miei ambient, Ivan Afonso.

Retirada der os Goiat deth miei

Eth conselhèr de Territòri e Sostenibilitat a confirmat era decision dera retirada der os Goiat deth miei a causa deth sòn comportament anomal e es sòns reïteradi atacs a bestiar equin.

En aguest sens, eth conselhèr Calvet a exposat que se trabalhe en procediment juridic e tecnic que permete aguesta extraccion, ena que son implicades diuèrses administracions, e reïterèc era volontat dera Generalitat “Seguir en tot trabalhar ena preservacion dera biodiversitat, en tot hèr-la compatibla damb activitat umana, tant damb era ramaderia extensiva coma eth torisme “.

Pera sua part eth sindic d’Aran, Carlos Barrera, destaquèc que “aguesta decision a de transméter tranquillitat e normalitat ath sector ramadèr aranés, pr’amor qu’era pèça clau d’aguesta problematica, er os Goiat, serà extrèt”.

Barrera arrebrembèc que, en 23 ans d’existéncia deth programa de reintroduccion der os en pirenèu, jamès s’auie arribat ad aguest punt de tension, e ahigec, es prumèrs interessadi en extrèir deth miei ad aguest exemplar a d’èster eth pròpri programa e es administracions e institucions qu’i hèn part entà non méter en risc tot eth trabalh realizat.

Politiques d’abitatge

Des deth Conselh Generau d’Aran s’a demanat ath departament de Territòri un estudi prealable des besonhs d’abitatges de prumèra residéncia en Aran en modalitat de loguèr accessible.

Sus aguesta demanda, eth conselhèr de Territòri e Sostenibilitat a explicat que se desvoloparàn tres linhes d’accion; aplicar mesures de caractèr urbanistic “entà saber de quini solars podem disposar”; hèr un estudi de mercat entàs trabalhs prealables des promocions; e elaborar “ua radiografia deth mercat segondari”, d’aqueri abitatges bastidi que se poderien destinar a loguèr sociau.

Elipòrt dera Val d’Aran

Eth conselhèr Calvet, a confirmat qu’eth pròplèu mes d’octobre auràn finalizat es òbres de melhora des installacions der elipòrt dera Val d’Aran. Aguest ampliament consistís en assegurar era operativitat dera installacion es 24 ores ath dia, reformar es espacis interiors der actuau angar en zòna de servicis e sala de gestion d’emergéncies e installar un angar e ua plataforma de parcatge en terren adjacent.

Accion d’urgéncia en Valarties

Entà finalizar eth sindic d’Aran a demanat ath conselhèr, ua accion de maxima urgéncia entara canalizacion des aigües que son en tot erosionar e ampliar er airau afectat per esbauçament deth vessant dret der arriu Valarties deth passat 12 de mai.

Eth materiau en suspension enlordís de forma grèu es aigües der arriu Garona, des dera poblacion d’Arties enquiara termièra francesa.

Era persistència d’aguest materiau, basicaments tèrra e hanga, qu’afècte eth cabau der arriu Garona, pòt provocar un damatge irreparable ara fauna icticola der arriu. Pr’amor qu’a ua afectacion dirècta as branquies des trueites e cabilats (espècia menaçada e en proteccion). D’autra banda, er hanga colmate es espacis existents en es graves e pèires der arriu en hons der arriu, en tot eliminar d’aguesta forma eth refugi de totes es espècies, en tot includir es invertebrades, basa dera alimentacion des trueites e es cabilats.