• Era amassada auec lòc eth passat dimars, dia 20 d’octobre, en Conselh Generau.

Peth prumèr còp s’amassèren ena Val d’Aran eth Conselh de Direccion dera Administracion Territoriau dera Generalitat de Catalonha en Lhèida e en Naut Pirenèu e Aran.

Era reünion se desvolopèc ena sedença deth Conselh Generau d’Aran a on sigueren arrecebudi peth sindic d’Aran, Carlos Barrera, que les dèc era benvenguda a toti es delegats e directors territoriaus deth Govèrn en tot hèr ua petita introduccion de toti aqueri ahèrs que se negòcien damb diferenti Departaments dera Generalitat de Catalonha.

Barrera tanben les expliquèc es trèti mès significatius qu’era actuau Lei d’Aran hè possible entà auançar damb un major autogovèrn territoriau aranés.

En aguesta reünion tanben i ère present er assessor deth Departament de Governacion enes ahèrs dera Val d’Aran, Álex Moga, que coma prioritat ena sua foncion ei era de coordinar e contunhar damb era evolucion deth desplegament dera Lei d’Aran enes airaus que s’an mercat, era evolucion deth modèl de finançament, en tot priorizar enes traspassi tan importants coma eth modèl pròpi dera gestion d’emergéncies en Aran.