• Aguest libre, editat pera Federació Catalana de Donants de Sang e revirat pera Associacion de Donants de Sang dera Val d’Aran damb era collaboracion deth departament de Lengua deth Conselh Generau d’Aran, apòpe as mès petits es valors de volontariat e solidaritat qu’an es donants de sang, capaci de sauvar vides

• “Era giganta dera sang” se harà arribar as escòles e bibliotèques dera Val d’Aran coma materiau didactic e, ath delà, s’aufrirà tanben as persones que vagen a dar sang eth pròplèu deluns, 26 de junhsèga, en Palai d’Espòrts de Vielha

“Era giganta dera sang” ei eth títol d’un conde infantil que narre era istòria reau d’Angeleta, ua senhora que, damb era sua generositat, ei capaça d’ajudar ues infirmières qu’arriben en sòn pòble en tot cercar naui donants de sang.

Aguest conde a estat escrit per Albert Torra, illustrat per Ermengol, e editat pera Associació de Donants de Sang de l’Urgell, damb era collaboracion dera Federació Catalana de Donants de Sang e era Diputació de Lleida. Ara, era Associacion de Donants de Sang dera Val d’Aran l’a revirat ar aranés, damb era correccion deth Departament de Lengua deth Conselh Generau d’Aran.

Damb aguesta revirada, es infants d’Aran poderàn descorbir ena sua lengua es valors de volontariat, altruïsme e solidaritat qu’an es donants de sang, capaci de sauvar vides.

Eth conde “Era giganta dera sang”, que tanben se pòt trapar en format digitau ena web dera Federació Catalana de Donants de Sang, se harà arribar as escòles e bibliotèques dera Val d’Aran entà que poguen èster utilizades coma materiau didactic. Damb era edicion en aranés dejà se supèren es 33.000 exemplars distribuïts en tota Catalonha tanben en catalan e anglés.

E totes es persones que venguen a dar sang tath Palai d’Espòrts de Vielha eth proplèu deluns, 26 de junhsèga de 2021, se’n poderàn emportar un exemplar. Rebrembetz qu’auetz de demanar cita prèvia en www.donarsang.gencat.cat/vielha.