Vielha, 28 de seteme de 2017.- Eth sindic d’Aran, Carlos Barrera, a convocat aué ua Ròda de premsa sus era jornada der 1-O.

En responsa as qüestions des periodistes eth sindic d’Aran a explicat qu’eth Conselh Generau d’Aran arrecebec era confirmacion per part dera policia judiciau que toti es lòcs de votacion qu’auien gescut religadi ena web dera Generalitat de Catalonha entath referendum der 1 d’octobre ena Val d’Aran, a compdar deth diuendres 29 de seteme seràn precintadi e jos vigilància policèra es 24 ores, en tot ahíger qu’ac a volut expressar ena convocatòria as mieis de comunicacion entà que aguesti poguen trasladar aguesta informacion a ciutadans dera Val d’Aran.

Eth sindic d’Aran, a manifestat en aguesta ròda de premsa, qu’eth, vò exercir eth sòn dret democratic de poder votar e que per açò se personarà en collègi electorau a on li correspon exercir aguest dret.

Tanben en responsa as qüestions des periodistes, Carlos Barrera, expliquèc qu’en clau intèrna dera Val d’Aran ei fòrça preocupant eth hèt que representants politics dera Val d’Aran, en concrèt eth baile de Vielha, Juan Antonio Serrano e eth secretari generau d’Unitat d’Aran, Francesc Boya, s’agen prestat damb es sues declaracions en mieis de d’àmbit espanhòu entà projectar ua imatge dera Val d’Aran indiscutiblaments prò-espanhòla.

Barrera didec que, sense entrar en un judici a hons, aguesta forma tan leugèra d’etiquetar un país non ère aconselhable ne prudent hè’c en aguest moment, e ahigec qu’en tot cas es actuaus representants des institucions araneses se presentèren as eleccions en basa en un programa electorau e non entà ostentar era representacion e interpretar eth pensament politic des ciutadans dera Val d’Aran.

Eth sindic d’Aran a finalizat en tot afirmar que s’a d’arribar ad aguest punt ja serà era ciutadania aranesa qui demanarà definir-se, e desiram qu’en aguest moment se pogue hèr damb serenitat e damb campanhes a on se poguen deféner es pròs e còntres dera pertenença administrativa e geografica dera Val d’Aran en Catalonha o non. Cau arrebrembar, didec, e eth pòble aranés ac a d’auer fòrça present, qu’er actuau estatus d’identitat, de singularitat e de capacitat politica d’autogovèrn en Aran eth pòble aranés l’exercís pera prumèra lei d’Aran de 1990 aprovada peth Parlament de Catalonha, atau coma era dusau lei d’Aran der an 2015 aprovada tanben peth madeish parlament, e qu’a estat eth Parlament de Catalonha qui a estat receptiu, a escotat e a hèt possible qu’aguest desir d’identitat e d’autogovèrn dera Val d’Aran contunhe viu gràcies ara volontat deth pòble de Catalonha e deth pòble aranés. En tot ahíger qu’a dia d’aué eth Govèrn espanhòu non a hèt cap reconeishement institucionau d’autogovèrn dera Val d’Aran.

En responsa a un tuit dera deputada dera CUP, Mireia Boya, Carlos Barrera, a manifestat respectar, mès non compartir era opinion d’aguesta deputada e l’a animada a plaçar en establiment rurau dera sua proprietat en Les ua sedença de votacion entath 1-O.