• Eth cicle d’ostiu deth Romanic Musicau està auent un gran èxit d’assisténcia

• Eth Trio Orfeu ei format per Joan Sancho ath violin, Ònia Tomàs ath violoncèl e Jordi Roure ara viòla

Un diuendres mès arribe ua naua visita e concèrt deth cicle d’ostiu deth Romanic Musicau, organizat peth Conselh Generau d’Aran e Foment Torisme Val d’Aran, damb era collaboracion der Archiprestat dera Val d’Aran. Deman, 23 d’agost tàs 22 ores, era Glèisa Era Purificacion de Maria de Bossòst acuelherà aguesta serada culturau amenizada pera musica deth Trio Orfeu.

Aguest acte començarà, coma tostemp, damb era projeccion d’un vidèo, realizat damb era ajuda dera istoriana Elisa Rosa, que conten era descripcion e contextualizacion dera glèisa, ua explicacion que servís entà facilitar informacion sus eth pas deth temps e coma a afectat ath monument e eth sòn entorn.

A continuacion, aurà lòc eth concèrt aufrit peth Trio Orfeu, format per Joan Sancho ath violin, Ònia Tomàs ath violoncèl e Jordi Roure ara viòla.

Eth sòn programa tà deman includís es següentes pèces:

• Vidèo comentat d’introduccion
• Contextualitzacion sus era òbra e vida de Bach.
• Era Chaconna, relacionada damb era mòrt dera prumèra hemna de Bach.
• Era Ofrenda musicau de Bach a Frederic eth Gran, ua jòia matematica.
• Es Variacions Goldberg, istòria d’aguesta òbra e descorbiment dera sua beresa “arquitectonica”.

Es darrères nets de Romanic Musicau an estat tot un exit d’assisténcia. En concrèt, era passada setmana, ath concèrt ena glèisa de Unha assistiren ath torn de 200 persones. Aguesta ei ua activitat culturau que permet gaudir deth coneishement sus er auviatge aranés e, ath còp, dera musica classica en un ambient unic.