• Aguest acte començarà damb un vidèo d’explicacion e contextualizacion dera glèisa e contunharà damb eth concèrt

• Eth Trio Constanza ei format per Natalia Borysyuk ath violin, Edmon Bosch ath violoncèl e Melani Mestre ath piano

Coma cada diuendres pendent eth mes d’agost, arribe ua naua visita e concèrt deth cicle d’ostiu deth Romanic Musicau, organizat peth Conselh Generau d’Aran e Foment Torisme Val d’Aran, damb era collaboracion der Archiprestat dera Val d’Aran. Aué, tàs 22 ores, era glèisa Sant Blai de Les acuelherà aguesta serada culturau amenizada pera musica deth Trio Constanza.

Aguest acte començarà damb era projeccion d’un vidèo, realizat damb era ajuda dera istoriana Elisa Rosa, que conten era descripcion e contextualizacion dera glèisa, ua explicacion que servís entà facilitar informacion sus eth pas deth temps e coma a afectat ath monument e eth sòn entorn.

A continuacion, aurà lòc eth concèrt aufrit peth Trio Constanza, format per Natalia Borysyuk ath violin, Edmon Bosch ath violoncèl e Melani Mestre ath piano.

Creat en an 2018, ena sedença dera Academia Internacionau de Musica de Barcelona, eth Trio Constanza nèish damb era volentat d’apropar eth repertòri catalan e espanhòu d’autors pòc coneishudi en marc de programes que recreen eth concèrt coma un hèt unic, originau e irrepetible.

Eth sòn programa tà aguesta net includís es següentes pèces:

• Fritz Kreisler – “Vienesse Miniature March”
• Enrique Fernández Arbós – “Tres peces op.1”: “Bolero”, “Habanera” & “Seguidillas”
• Antonio Vivaldi – “Hivern”, de les 4 estacions
• Melani Mestre – “Violintango Concerto”: Adagio
• Tomás Bretón – “Polo gitano” & “Scherzo Andaluz”, de “Quatre peces espanyoles”
• Carles Cases – “Trio”