• Eth Conselh Generau d’Aran collabòre, un an mès, damb aguesta competicion qu’aurà lòc entre es dies 5 e 9 de junhsèga enes nòstes montanhes e qu’enguan demore mès de 5.400 corredors e corredores de mès de 80 nacionalitats, en tot bàter atau es chifres anteriores

Era Val d’Aran acuelherà, pendent es dies 5 e 9 de junhsèga, era tresau edicion dera Val d’Aran by UTMB®. Es nòstes montanhes acuelheràn enes pròplèu dies as mès de 5.400 corredors e corredores de mès de 80 nacionalitats que s’an inscrit entà competir en bèra ua des cinc distàncies: era VDA 163 km, era CDH 110 km, era PDA 55 km, era EXP 32 km, e era SKY 15 km.

Per dusau an consecutiu, era Val d’Aran by UTMB® revalide eth sòn títol coma UTMB® World Series Major e ei er unic eveniment en Euròpa qu’aufrís ua plaça dirècta entara UTMB® Mont-Blanc as dètz prumèrs òmes e es dètz prumères hemnes que finalizen era VDA, era CDH e era PDA, ena sua categoria equivalenta (OCC® 50K, CCC® 100K, e UTMB® 100M).

“Eth govèrn deth Conselh Generau d’Aran collabòre, un an mès, damb aguest eveniment pr’amor que credem que supause ua oportunitat unica entà seguir plaçant ara Val d’Aran coma un teritòri de montanha de referéncia a nivèu internacionau e, gràcies ad aguesta tresau edicion, seguiram auançant entà hèr-mos un lòc ena elit deth trail running mondiau”, manifestaue era sindica d’Aran, Maria Vergés.

Era celebracion d’aguest eveniment tant prestigiós e coneishut a nivèu mondiau supause un gran impuls toristic entath país a principis deth mes de junhsèga, ua accion de desestacionalizacion plan importanta entà Aran.

Es persones interessades pòden trapar tota era informacion ena web oficiau dera competicion: https://www.aranbyutmb.com/