• Era passada setmana s’aprovèc aguest Plan director, que regule es condicions entà establir naui campings e damb eth quau se permeterà eth plaçament d’aguest tipe d’installacions en zònes de montanha damb pedents significatives

Eth passat dimars, 8 de junh, s’aprovèc ena Comission d’Urbanisme dera Val d’Aran, de manèra provisionau, eth Plan Director Urbanistic (PDU) des activitats de camping des municipis dera Val d’Aran, un PDU que siguec aprovat definitivament a nivèu de tot Catalunya eth dia 10 de junh per part dera Comission de Territòri de Catalunya.

Era legislacion actuau prevé qu’es campings s’installen en solèrs non urbanizables, mès non fixe cap critèri concrèt sus coma s’an d’implementar ne a on. Cau auer present que, damb eth temps, es campings an evolucionat de aufrir servicis basics entà lotjar tendes o caravanes pendent periòdes cuerts a aufrir unitats de lotjament fixes o semimobils, en tot incorporar naues infraestructures e servicis.

“Aguest Plan regule es critèris a seguir entath plaçament de naui campings e non a granes afectacions enes campings preexistens en nòste territòri”, afirmaue eth conselhèr de Governacion, Amador Marqués, en tot híger que: “ua des nauetats mès importantes ei que se permeterà plaçar aguest tipe d’installacions en pendents superiors ath 20% enes zònes de montanha coma era Val d’Aran, çò qu’ei de besonh entà poder preservar es solèrs rustics planèrs, qu’ath delà presenten un naut risc d’inundabilitat”.

Aguest nau Plan director concrète directius generaus qu’afectaràn ar establiment de campings en tot eth territòri, recomanacions entàs ajuntaments ara ora d’autorizar naui establiments enes sòns municipis, e tanben d’auti aspèctes especifics de dessenh e ordenacion entàs naus campings.

Per çò que hè as campings dejà existents, eth Plan establís un regim transitòri que permet ampliacions tostemp que vagen restacades a melhorar era qualitat des servicis e adaptacion paisatgistica des installacions. Tanben s’especifique qu’es installacions existentes que non complisquen damb es criteris deth PDU poiran demorar en territòri, de forma transitòria, s’eth planejament municipau atau ac considère, damb quauques condicions. Finaument, s’apunten diuèrses intervencions possibles enes campings existents entà melhorar eth risc d’inundabilitat.